10 iku indu deka ngerebut gelar Kumang Gawai Dayak Sibu 2018, 26 Mei tu

SIBU: Sepuluh iku indu udah mujur ke renggat kepenudi lalu deka ngerebut gelar Kumang Gawai Dayak Sibu 2018 kena 26 Mei ti deka digaga bepalan ba Dewan Suarah Sibu.

Pekit nya digaga beserimbai enggau Pengerami Makai Lemai Mantar Gawai Dayak Renggat Bagi Menua Sibu 2018 ke diatur Gerempung Bansa Dayak Sarawak (SDNU) Sibu enggau Sarakup Indu Dayak Sarawak (SIDS) Sibu.

Sapit Kepala Menteri Datuk Amar Doughlas uggah Embas dijangka deka datai nyadi temuai ti dipebasa ba pengerami nya ila.

Dulu agi ari nya, bisi 20 iku indu dara udah besemekih ba renggat keterubah ti digaga kena 11 Mei tu tadi ke bepalan ba Opis SDNU/SIDS Sibu, ba Jalai WOng King Huo.

Taja pia, semina 10 iku aja finalis ti dipilih ke renggat final (26 Mei).

Bala sida ti masuk ke renggat final iya nya Rebecca Jane Jemeb, Mcqueen Menti Entry, Wati Assan, Maliyana Maradi, Sharon Mathew, Christina Ringgit, Valerie Michelle Alli, Cinderella Simong, Terrina Rosser Mujah enggau Florence Jega Jungan.

Semua pesereta ba renggat keterubah nya dipilih ari sukut pemajik, raras tubuh enggau peninggi.

Akim ti milih sida tu iya nya Komiti Eksko SDNU Sibu Raymond Menjang, Penyanding Penemu SIDS Sibu Catherine Nain Abit enggau Sapit Chairman SIDS Sibu Monica Giri.

Kumang Gawai Dayak Sibu 2018 deka mai pulai perais mata duit RM1,500 sereta trofi, hamper, selampai eng- gau jumpang lalu ba penuduk lumur dua ( Lulong) deka nerima mata duit RM1,200 sereta trofi, hamper enggau selampai sereta ba penuduk lumur tiga (Selinggar Matahari) mai pulai mata duit RM1,000 sereta trofi, hamper enggau selampai.

Penuduk lumur empat deka mai pulai mata duit RM300 sereta selampai lalu lumur lima nerima mata duit RM250 enggau selampai.

Sida ke ba penuduk lumur enam nyentukka sepuluh deka nerima mata duit RM150 siku sereta saguhati.