Semua utai ke dirampai nya dipechaya bisi kaul enggau ex-menteri besai, Datuk Seri Najib Tun Razak dalam tasat kes 1MDB
KUALA LUMPUR: Polis Diraja Malaysia (PDRM) ngerampas 72 beg berisi barang emas, bemacham bansa mata duit enggau barang rega di sebuah kondominium mar ditu, ke dipechaya bisi kaul enggau ex- menteri besai, Datuk Seri Najib Tun Razak dalam tasat kes 1Malaysia Development Berhad (1MDB).
Direktor Opis Nasat Pengawa Jai Komersial (JSJK) Bukit Aman, Datuk Seri Amar Singh Ishar Singh madah, 284 kutak ke ngembuan beg sandik bemacham chap mar mega dirampas ari tiga buah unit endur diau di kondominium nya ba Jalai Raja Chulan ditu.
Ku iya, ungkus barang ke dirampas bedau ulih ditentuka laban penyampau barang ke dirampas nya mayuh.
“Polis deka meresa silik pagila (sehari tu) dikena nentuka pengamat rega barang ke dirampas nya,” ku iya ba aum media sepenembu operasyen meresa kondominium nya pukul 2 pagi kemari.
Ku iya, JSJK udah meresa sereta kenyau ari malam kemarin ba enam buah permis dikena mantu tasat kes 1MDB ba Opis Menteri Besai enggau rumah Menteri Besai di Seri Perdana Putrajaya, rumah Najib empu ba Jalai Langgak Duta, Taman Duta, ditu sereta tiga unit endur diau ba kondominium nya.
Ku iya, antara beg sandik mar ke dirampas iya nya chap Hermes Birkin enggau Louis Vuitton.
Iya mega madah, nadai orang ba unit kondominium nya maya polis meresa sereta ngerampas barang ke berega dia. “Ungkup kes nyerungkai endur diau ke mar nya, polis udah bulih pemendar ari kort sereta nadai napi sebarang penanggul ari sesapa aja maya meresa nya,” ku iya.
Polis nguna lima trak polis mai beg enggau kutak beg sandik nya berengkah ari pukul 12. 15 tengah malam lalu tembu dua jam setengah udah nya.
Ditanya sentang barang ke dirampas ba endur bukai, Amar m adahka barang ke dirampas ba Opis Menteri Besai iya nya dokumen ke dipechaya bisi kaul enggau 1MDB sereta barang ke berega bukai ari rumah Najib empu ditu.
Ku iya,proses ngeruga nya deka dipajak nyentuk ke tembu.
Ditanya sentang pengempu tiga unit kondominium mar nya, iya madahka nya diempu siku orang ke begelar ‘Tan Sri’.
Kelimpah ari nya, bekaul enggau ripot media ti madahka beg ke dirampas nya ngembuan beluku emas, Amar enggai nyebut pekara nya.
Ditanya sekalika semua barang ke dirampas nya udah chukup nyadi bukti di kena nawa Najib, ku iyaa pemutus nya deka dipadahka Kepala Polis Menua,Tan Sri Mohamad Fuzi Harun.
“Aku semina nerima perintah bejalaika tasat nyerungkai bekaul enggau kes 1MDB,” ku iya.
Amar mega madahka peti besi ti ditemu ba rumah Najib empu di Jalai Langgak Duta ditu, mengkang dalam proses ngebur lalu muka nya.
“Kami nasat kes enggau profesional… aku mega udah merintahka semua pemesai enggau raban aku nasat kes tu enggau silik,” ku iya.
Iya mega ngenukuka deka mantaika semua barang ke dirampas dalam aum media ba awak ke semak. — Bernama
Polis deka meresa silik pagila (sehari tu) dikena nentuka pengamat rega barang ke dirampas nya. Datuk Seri Amar Singh Ishar Singh Direktor Opis Nasat Pengawa Jai Komersial (JSJK) Bukit Aman