Isu sekula tuai, repuk patut terus dikemeratka Perintah PH
KUCHING: Pemansang pelajar ba nengeri tu nyengkaum isu sekula tuai sereta repuk patut terus dikemeratka perintah besai baru ke diperintah Pakatan Harapan (PH).
Menteri Pelajar, Sains enggau Pemansik Teknologi, Dato Sri Michael Manyin Jawong madahka bidang pelajar nya ungkup semua orang.
Nya alai, iya ngarapka pekara pelajar enda deka dipolitikka perintah besai baru ti betuaika Tun Dr. Mahathir Mohamad.
“Taja pan pekara pelajar ari baruh bidang kuasa perintah besai tang mayuh institusyen pelajar ti ditumbuhka ba nengeri tu iya nya dibaruh Rintai Negeri.
“Entara nya, Universiti Teknologi Swinburne, Curtin Sarawak enggau mayuh agi palan latih teknikal enggau vokasional ( TVET) ti ari baruh bidang kuasa nengeri.
“Nya alai, kitai udah numbuhka opis menteri ba reng- gat nengeri dikena nyaup pengeran tauka pemendar perintah besai ngemansangka bidang pelajar ba menua tu nengah Opis Menteri Pelajar Malaysia (KPM),” ku iya.
Iya mansutak pekara nya lebuh ditelefon Utusan Borneo kemari
Tang ku iya, opis menteri iya ke nyaga pekara pelajar nengeri tu deka bekerejasama enggau Menteri Pelajar Malaysia ti baru tu ke penguntung rayat ba nengeri tu.
“Kitai ba renggat perintah nengeri sedia nempa kerejasama enggau KPM ba perintah besai dikena nentuka pekara ke diperambu enggau ti udah dipejalai baka ke udah diperambu,” ku iya.
Ditanya pasal pemansang sekula tuai sereta repuk di nengeri tu, Manyin madahka Sarawak udah diungkupka perintah besai RM1 billion ke sebedau tu ke tuju nya.
Nya alai ku iya, sida deka matau projek-projek sekula tuai sereta repuk ba nengeri tu ngambika dipejalaika nitihka perambu.