Taja menua dipegai PH tang semua polisi enggau pengawa pemansang ke diperambu ngelama tu enda berubah
LIMBANG: Pengelantang pendiau rayat Sarawak deka terus nyadi agenda besai perintah nengeri taja perintah besai diatu dipegai Pakatan Harapan (PH).
Sapit Kepala Menteri Datuk Amar Awang Tengah Ali Hasan madah, semua polisi enggau pengawa pemansang ke diperambu ngelama tu sigi enda berubah.
“Pemansang ke diperambu, projek ke dikemendar sebedau tu dibaruh pegai pengari rayat enggau opis menteri deka ditampung,” ku iya.
Iya madah munyi nya rambau Pengerami Nyuaka Bantu Raya ngagai pemesai enggau masjid/surau, indai tunggal enggau bala anak patut balu diberi Kaun- sil Amanah Pengelantang Pendiau Islam Limbang (LAKIL) di Dewan Suarah ditu, kemari.
Bela datai iya nya Menteri Muda Betanam Betupi Dr Abdul Rahman Ismail, Kaban Parlimen Limbang Hasbi Habibollah, ADUN Batu Danau Paulus Palu Gumbang, Residen Bagi Menua Limbang Ir Ahmad Denney Ahmad Fauzi, Ketua Tabung Baitulmal Limbang Junidi Lamat enggau Tukang Wang LAKIL, Mahmud Amit.
Awang Tengah ke mega Menteri Pemansang Mengeri enggau Pengeraja Asal Kedua, Menteri Pemansang Industri enggau Pemansang Sarawak madah, rayat di nengeri tu enda ibuh irau enggau ubah ketuai merintah ke diiring PH.
Sarawak ku iya, deka neruska pengawa merintah baka ke diatu nyadi perintah penyakal ti liat ati.
“Kelimpah neruska pemansang, guna enggau pengelantang rayat, Kepala Menteri Datuk Patinggi Abang Johari Tun Openg mega deka neruska pengawa fokus ngagai pengelantang pendiau rayat Sarawak nengah pengawa nagih jak-hak nengeri tu.
“Perintah besai mega ngembuan tanggungpengawa mantu rayat nyengkaum ba Sarawak bepelasarka undangundang,”ku tandu iya.
Awang Tengah madah, perintah PH deka bejalaika mayuh tanggungpengawa mantu Sarawak nitih ke udah dituls nengah undang-undang nyengkaum meri agih belanja ngagai nengeri.
Ba pengerami nya, LAKIL bisi nyuaka pemeri ngagai 166 indai tunggal, 82 anak patu balu enggau urung RM31,500 ngagai 210 pemesai masjid enggau sura ba pelilih tu.
Sarawak dipegai perintah kediri empu lalu deka neruska pengawa nyaga pengelantang pendiau rayat di nengeri tu. Datuk Amar Awang Tengah Ali Hasan Sapit Kepala Menteri Sarawak