Raban orang indu patut chakah nayup ngatur pemansang ruang bilik
SARIKEI: Serakup Raban Orang Indu Sarawak (PPWS) pampang Sarikei telah ngatur Pengerami Makai Lemai nyerumba Hari PPWS Ke-56, apin lama ke udah.
Pengerami nya udah dipenyadika Kaban Kunsil Nengeri (ADUN) Repok, Dato Sri Huang Tiong Sii.
Ba jaku iya maya pengerami nya, Huang nesau bala orang indu, lebih agi kaban PPWS patut terus chakah sereta seruran bebendar ngemansangka diri lebih agi dikena nyapai juluk enggau mega pemujur ngatur ruang bilik.
Ku iya, kemaya hari tu orang indu patut sedia sereta nyikap diri napi sebarang aja pemar nyema deka mujur dalam pengidup.
“Raban orang indu patut angkat sereta pintar nguna peluang ke bisi dikena ngemansangka diri. Juluk enggau pengeliat ati baka tu patut bisi, laban genap pemujur enggau penyulut ke dijapai ukai utai ke muntang diasai,” ku iya rambau pengerami ke diatur ba sebuah restauran ditu, kemari.
Pengerami nya bisi digulu 22 raban PPWS ari pelilih Sarikei, ke mungkur lebih 1,000 iku kaban.
Ba pengerami nya mega, Huang bisi madah raban orang indu patut ngena pengelebih enggau pengelandik sida dalam nyingkang ke mua.
“PPWS patut seruran ngena atur proaktif dalam mantu bala kaban iya nyungkak ekonomi,”ku iya.
Bela bisi datai ba pengerami nya Sapit Chairman PPWS Sarawak, Norjanah Haji Razali, Chairman PPWS Sarikei Haidah Noor, Sapit Chairman PPWS Sarikei Chuong Chan Ho, Chairman Kaunsil Pelilih Sarikei ( MDS) Wong Zhi Ying sereta kaban PPWS ke bukai.yang lain.