DAP Sarawak udah ngerami pemujur sida ba PRU Ke-14
KUCHING: Parti Tindakan Demokratik (DAP) Sarawak mujur ngatur pengerami meri basa nyerumba pemujur besai sida mantu Pakatan Harapan ( PH) numbuhka perintah besai ke baru Restoren Thian Court, Crown Squuare ditu, ensana.
Chairman DAP Sarawak Chong Chieng Jen madah, pengerami makai lemai nya mega ngerami sida ke udah mujur ngalah Barisan Nasional ( BN) ba Pengawa Bepilih Besai Ke-14 (PRU14) tu tadi.
“Dalam beberapa hari aja, kitai udah mujur bejalaika nama pekara ke udah disemaya ungkup PRU-14 ngagai rayat baka ngemaduka Chukai Barang enggau Servis (GST) bepun 1 Jun ila laban chukai tu balat ngenusah semua kitai.
“Kelimpah nya, kiyai mega deka lengkas bejalaika pansik ngagai isu 1Malaysia Development Berhad (1MDB) ke bisi kaul enggau ex-Menteri Besai Datuk Seri Najib Tun Razak ti sepengudah PH mujur numbuhka perintah baru,” ku iya rambau bejaku ba pengerami meri basa nya.
Chong ke mega chairman PH nengeri madah, pemujur nya ukai semina ungkup parti nya aja tang mega siti pemujur ungkup semua penyukung enggau rayat di nengeri tu.
“Kitai enda ulih malas jasa enggau pemanah pengawa ke udah digaga semua kita tang kami deka nentuka diri terus bebendar gawa awakka meri pemaik ngagai semua rayat,” ku iya.
Dulu ari nya, kaban senior ke mega penyanding penemu DAP Sarawak Chong Siew Chiang madah, parti nya udah bebendar lebih 40 tahun dikena nyapai pemujur baka sehari tu.
Ku iya, pengeransing pengawa sida ngelama tu ujung iya ngemansutka asil maya perintah dipegai BN pengelama 60 taun mujur ditum- bang.
Apai ngagai chairman DAP Sarawak nya madah, pengawa sida bedau abis laban juluk deka ngambi perintah nengeri bedau ulih japai.
“Kitai deka bebendar gawa awakka ulih ngambi perintah nengeri ba Pengawa Bepilih Besai Ke-12 ila,” ku iya.
Berebak enggau nya, Kaban Parlimen Bandar Kuching ke baru, Dr Kelvin Yii Lee Wuen madah, biya chukup gaga ati enggau jeman perintah baru ke mujur nempa sejarah baru ungkup Malaysia.
Ku iya, piak sida udah besemaya ngagai rayat iya nya mansik belanja 1MDB sereta ngemaduka GST nyema mujur numbuhka peirntah baru.
Udah nya, Kaban Parlimen Mas Gading Mordi Bimol mega gaga ati enggau pemujur PH ba PRU-14 lalu besemaya deka nentuka jalai lama Kuching-Bau dikemanah ke pemaik mensia mayuh ke diau ba sitak nya.
Iya mega bisi nyadaka lagu dikerindu iya ‘Saya Anak Mas Gading’ ba pengerami nua. Sama bisi datai Kaban Kunsil Nengeri (ADUN) Padungan Wong King Wei, ADUN Pending Violet Yong enggau temuai ke bukai.