Mawan deka ngatur gempuru Gawai Dayak di ‘Rumah Rehat’ Saratok
KUCHING: Ex- kaban Parlimen(MP) Saratok Tan Sri William Mawan deka ngatur gempuru Gawai Dayak di ‘Rumah Rehat’ Saratok ba ujung minggu siti ke deka datai.
Gempuru nya nyadika palan endur iya meri basa lalu beserara enggau peranak di parlimen nya ketegal udah tu iya deka beratka pengawa politik enggau sosial di Pakan ke alai iya nyadi kaban kunsil nengeri(ADUN) dia.
Mawan ke siku orang kering dalam Barisan Nasional(BN) sereta kaban dalam Parti Pesaka Bumiputera Bersatu(PBB) madah nerima pemutus rayat ti keran dekaka ubah.
“Pengudah tembu pengawa bepilih, kekadang sekeda kitai enda ingat meri jaku terima kasih ngagai bala penyukung.
“Lalu enti alah, sida deka nyalahka orang bukai. Tang aku enda baka nya,”ku iya.
Berindik enggau nya, Ma- wan ngelalu semua peranak di Saratok datai ngerami gempuru Gawai Dayak nya.
Ku iya, pengari rayat ari sitak Kunsil Nengeri Kalaka enggau Kabong nyengkaum MP ke baru ke mega ADUN Krian Ali Biju bela dikangau datai.
Gempuru Gawai Dayak tu ungkup kitai semua, tandu iya.
Mawan enda disabung BN ngenanka Saratok ba pengawa bepilih ke udah lalu diganti chalun ari Parti Progresif Demokratik( PDP), Subeng Mula ke alah betengali alan enggau chalun PKR, Ali.
Iya nyadi MP Saratok serenggat aja pengudah menang ba pengawa bepilih taun 2013 ngalahka Ali Biju enggau chalun bebas Datuk Abang Rosli Abang Paleng nengah majoriti 2,081 undi.
Kala nyadi presiden SPDP( PDP diatu) enggau Parti Tenaga Rakyat Sarawak( TERAS), Mawan ba taun 2016 ningkilka diri ari TERAS ngambi ulih nyadi chalun langsung di Pakan ke alai iya menang nengah majoriti mit, 426 undi.