19 MP BN ke menang di Sarawak deka nerima agih RTP, MRP, PK
KUCHING: Perintah nengeri deka meri ungkup belanja Program Transformasyen Menua Pesisir (RTP), Projek Mit Menua Pesisir (MRP) enggau ngemanah palan servis (PK) ungkup Kaban Parlimen (MP) Barisan Nasional (BN) ba nengeri tu dikena ngatur pemansang.
Kepala Menteri Datuk Patinggi Abang Johari Tun Openg madahka ungkup belanja ke diagihka nya deka sama enggau penyampau ke diterima Kaban Kunsil Nengeri (ADUN) ba nengeri tu.
Ungkup belanja nya deka diterima 19 Kaban Parlimen Barisan Nasional (BN) ke udah menang ba pengawa bepilih besai ke- 14 apin lama.
“Au (meri ungkup belanja RTP, MRP, enggau Pusat Khidmat ngagai Kaban Parlimen).
“Penyampau sama enggau ke diterima bala ADUN,” ku iya.
Abang Johari ti mega Chairman Barisan Nasional (BN) Sarawak mansutka pekara nya lebuh ditanya bekaul enggau sekalika Kaban Parlimen BN nengeri tu nerima geran belanja nya tauka enda.
ADUN BN nengeri tu nerima ungkup belanja RTP sepenyampau RM5 juta, MRP RM1 juta enggau dikena menyelengara pusat khidmat RM250,000.
Kelimpah ari nya lebuh ditanya bekaul enggau kemaya aum enggau parti komponen BN Sarawak ti berandauka pasal serakup politik, Abang Johari madahka, nganti udah abis bulan Ramadan.
“Nganti dulu, nganti bulan Ramadan tu abis.
“Ila kitai madahka kemaya aum pasal nya deka diatur,” ku iya nyaut enggau pandak.
Dulu ari nya Abang Johari bejadika laman web eCemetary enggau ngagihka Bubur MASJA-SA ke diatur Lembaga Amanah Kebajikan Masjid Negeri Sarawak (LAKMNS) ba Laman Masjid Jamek Negeri Sarawak ditu, lemai kemari.
LAKMNS enggau Sarawak Informastion System Sdn Bhd (SAINS) udah ngemansangka sistem “e- Cemetary GIS System Project”. Tuju sistem tu dikena ngemudah enggau ngenyampatka proses ngiga nama jenazah ba Tanah Perkuburan Semariang.
Entara kelai bukai iya nya meri pemeri ngagai Masjid, Surau enggau sekula sereta kelai pemeri Ramadan ngagai nembiak ti kurang penatai pemisi enggau anak patu.
Sama bisi datai ba pengerami nya kemari Menteri Muda Lektrik Menua Pesisir ti mega nyaga Hal Ehwal Islam nengeri tu Dr Abdul Rahman Junaidi, Menteri Dagang Temuai, seni, Budaya, Nembiak enggau Lumba enggau Main Datuk Abdul Karim Rahman Hamzah, Kaban Parlimen Petra Jaya Datuk Seri Fadillah Yusof,Sekretari Dipebasa LAKMNS Tan Sri datuk Amar Bujang Nor,Menijar Besai LAKMNS Mohamad Sabry Othman enggau ke bukai.