SUPP ningkah Chong bekaul ‘semaya baru’
MIRI: Parti Rakyat Bersatu Sarawak ( SUPP) ningkah penerang dipansutka Chairman Pakatan Harapan (PH) Sarawak Chong Chieng Jen, ti enggau bejalaika ‘semaya baru’ ungkup Sarawak, lalu ngasaika PH Sarawak enda ngamatka semaya pengawa bepilih sida ungkup rayat di nengeri tu.
“Maya kimpin pengawa bepilih besai (PRU) ke-14, PH nyemetak madah dalam manifesto pengawa bepilih besai sida, ‘Bup Harapan’, nengah ‘Janji 41 enggau 47’, iya nya nyema PH megai perintah baka sehari tu, PH deka nentuka pengelantang rayat Sarawak nengah pengawa nikika royalti petroleum Sarawak ngagai 20 peratus.
“PH mega deka bejalaika pengawa ngambi pulai kuasa ungkup Sarawak, nyengkaum ngambi pulai asil chukai ke digumpul di Sarawak manggai 50 peratus ungkup nengeri tu,” ku Sekretari Pemadah SUPP Pusat Adam Yii ditu, kemari.
“Tambah mega Chong nengah mayuh pengerami ke digulu iya, nyemetak nandu semaya-semaya nya, nyengkaum dalam surat kabar enggau mega video-video kimpin iya sebedau tu, ke dipeda mensia mayuh nengah media rama enggau telefon binching,” ku tandu Adam.
Iya madah, SUPP ngasaika enggai naydi PH Sarawak madah ‘ semaya baru’ nya enda ulih dipejalai enti ketegal perintah Sarawak enggai sain ‘Semaya Baru’ ti disediaka PH Sarawak. “Keterubah, kami ngasaika PH Sarawak sigi nadai sebarang utai bekaul ‘ semaya baru’ bepelasarka Bup Harapak engagu sida mega nadai madahka semaya ke patut disain perintah Sarawak ngambika PH ulih ngamatka semaya sida.
“Tambah mega mayuh peranak Sarawak udah meda video kimpin Chong, bisi ke enda iya nyebut pasal ‘ semaya baru’ nyadi tikit dikena PH ngamatka semaya sida? Enda kala sida nyebut nya,” ku iya nerang silik. Yii madah, SUPP mega deka ngingatka PH iya nya semua semaya sida ke diterang nengah manifesto endang semaya sida empu ungkup rayat Sarawak, ukai enggau perintah Sarawak. “Maya PH nabur semua semaya nya ngagai rayat, lalu rayat milih ngundi sida megai perintah ba Pengawa Bepilih Besai (PRU) ke udah , nya endang kebuah ke chukup manah dikena PH mupuk gawa ngamatka semaya sida ungkup rayat lalu ukai ngaga kedalih sengapa,” ku iya nerang.
Tambah mega, SUPP ngasaika PH tusah deka ngamatka semaya sida ngagai rayat Sarawak.
Nya alai, chong diatu nunjukka jari ti nyalahka perintah Sarawak laban enggau sain semaya baru, nya dikena iya nyeliahka tanggungpengawa enggau ngamatka semaya ke udah disebut diri empu,” ku tandu Yii.