Anang rindang ngiga untung nyentuk ke enda jaga pemeresi
LIMBANG: Pedagang bazar Ramadan di pelilih tu dirandau anang kelalu ngiga untung nyentuk ke enda nyaga sukut pemereti enggau kualiti nyendia pemakai.
Menteri Muda Betanam Betupi Dr Abdul Rahman Ismail madah, pemeresi nyendiaka pemakai patut nyadi pekara lumur satu dikemerat maya bejalaika dagang sekumbang Ramadan tu.
“Pedagang enda patut ngemeratka sukut untung aja nyentuk enda ingatka tanggungpengawa sida nya- ga pemeresi enggau kualiti produk ke dijual,” ku iya.
Iya madah munyi nya rambau bejadika Bazar Ramadan Pelilih Limbang ensana. Bela datai Kaban Limbang Hasbi Habibollah, ADUN Batu Danau Paulus Palu Gumbang, Ketuai Kaunsil Pelilih MDL Kaunselor Sufian Mohat, Sapit Ketuai Kaunsil Kaunselor Dahlan Dullah enggau Chairman Pengatur Program Bazar Ramadan 2018 Kaunselor Niti Rosli.
Urung 120 pedagang palan nyumai, 37 pedagang kain enggau 20 pedagang kuih enggau roti raya nyereta bazar serak tu.
Berebak enggau nya, Dr Abdul Rahman ke mega ADUN Bukit Kota madah urung RM25,000 diagih ngagai Kaunsil Pelilih Limbang (MDL) dikena mayar ungkus nyendiaka kanopi ungkup bala pedagang bazar Ramadan di pelilih tu, taun tu.
Iya madah, ninting taun MDL mansutka belanja ke chukup besai dalam ngemujurka program bazar Ramadan.
“Dikena ngemuntang MDL, urung RM25,000 diagih dikena mayar ungkus nyendiaka kanopi bazar Ramadan,” ku iya.