KGBS nerima manah polisi Menteri Pelajar baru: Ahmad
KUCHING: Gerempung Pengajar Bumiputera Sarawak (KGBS) ngelaluka polisi ti dipejalaika Menteri Pelajar baru, Dr Maszlee Malik ngagai pelajar di menua tu.
Presiden KGBS, Ahmad Malie madah, antara nya ngurangka tating bala pengajar, ngemitka saiz tauka penyampau nembiak alam kelas kelimpah numbuhka pangku pengawa pemantu pengajar enggau ke bukai.
“Nya alai, dikena nerang silik enggau lenak agi polisi baru Opis Menteri Pelajar tu, gerempung merambu ngambika raban sida ulih ngatur randau enggau serakup pengajar naka penyampat.
“Ari nya, gerempung tauka serakup pengajar deka nerima penerang pemadu baru kelimpah meri kerejasama ngagai Ketuai Dipebasa Menteri ngambi ngelancharka pejalai polisi ti udah dibantaika iya,” ku iya madah ngagai Utusan Borneo ditu, kemari.
Ku Ahmad, bepelasarka pekara ti dibantaika Menteri nya, KGBS beratika bisi pengawa iya deka ngenegap sereta ngangkatka opis menteri enda lama agi.
Kelebih agi ku iya, pengelantang enggau servis bala pengajar di serata menua.
“Nya alai KGBS ngelalu sereta meri tabi puji ngagai Dr Maszlee Malik ti udah dipadu nyadi Menteri Pelajar baru.
“Berebak enggau nya, KGBS mega nerima manah polisi baru opis menteri nya baka ti udah dibantaika iya ba atur aum keterubah enggau bala pemesai tetinggi Opis Menteri Pelajar Malaysia,” ku iya.
Iya mega meri terima kasih ngagai menteri baru enti sema ulih ngatur randau enggau raban gerempung tauka serakup pengajar enggau jampat.
Baerebak enggau nya, Hari Satu tu tadi, Maszlee antara 13 menteri kabinet perintah Pakatan Harapan (PH) ngangkat sumpah mangku pengawa ba mua Yang di-Pertuan Agong di Istana Negara.
Pengawa ti diatur berengkah urung pukul 5.50 lemai.
Sapit Menteri Besai Datuk Seri Dr Wan Azizah Wan Ismail ke mega Menteri Pekara Raban Indu enggau Pengelantang nguluka rintai menteri ba pengawa nya.