Program meri kuih deka dipajakka, ku Fatimah

KUCHING: Perintah nengeri deka neruska program meri kuih dikena meri terima kasih sereta ngingatka raban penyaga pengelikun enggau penerit adat ti ngenukuka pemaik enggau pengelantang rayat enggau menua tu.

Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Datuk Fatimah Abdullah madahka perintah nengeri meri pemeri kuih ngagai 8,000 iku raban penyelamat enggau penerit adat nengeri tu ke gawa maya pengerami Gawai Dayak enggau Hari Raya Aidilfitri, nengah program ‘Sumbangsih Kuih Gawai Raya 2018’.

Ku iya program nya udah 28 taun udah diatur, iya nya kenyau ari taun 1990 nyentuk ke diatu lalu nyadi program tiap taun.

Ku iya, keterubah program meri kuih diatur (taun 1990) dibaruh Biro Indu (kenyau Januari 2015 dikelala ngena nama Opis Orang Indu enggau Ruang Bilik SarawakJWKS) semina nyendiaka 2,00 bungkus ke diberi ngagai Raban Soldadu Malaysia (ATM) enggau Polis DIraja Malaysia (PDRM).

“Taun 2018 iya nya taun ke pemadu mayuh, ke alai JWKS nyendiaka 8,000 bungkus kuih sereta deka diagihka ngagai 10 ejensi penerima.

“Tu ke kelai terima kasih kitai ngagai raban penyelamat enggau penerit adat ke ngenukuka pemaik enggau pengelantang Nengeri Sarawak,” ku iya.

Fatimah mansutka pekara nya dalam jaku pengelalu pengerami nyuaka Sumbangsih Kuih Gawai Raya 2018 ke diatur JWKS ba Dewan Kunsil Nengeri (DUN) Lama ditu, kemari.

Pengerami nya dipenyadi Kepala Menteri Datuk Patinggi Abang Johari Tun Openg, ti mega bisi digulu bini iya Datin Patinggi Dato Juma’ani Tun Tuanku Bujang.

Sepuluh ( 10) ejensi ke nerima pemeri kuih nya nyengkaum ATM diagihka 2,800 bungkus; PDRM (1,800); Opis Pengerara Api enggau Penyelamat Malaysia (Bomba) Sarawak (900); Opis Jil Nengeri Sarawak (300); Agensi Penerit Adat Maritim Malaysia (900);

Opis Imigresyen Nengeri Sarawak bisi nerima 300 bungkus kuih; Opis Kastam DiRaja Malaysia (300); Opis Perengka Pengangkut Jalai (200) sereta bisi dua penerima baru iya nya Angkatan Pertahanan Awam Malaysia (200) enggau Opis Sukarelawan Malaysia diagihka 250 bungkus.

Taun tu bisi tujuh bansa kuih ti diberi iya nya baka kek hati parek; kek buah; serunding daging, biskut bawang, bahulu, muruku enggau nasi impit (beras).

Lalu semua kuih nya disediaka tujuh gerempung orang indu ti mungkur 350 iku ke nyadi sukarelawan.

“Kitai beterima kasih ngagai perintah nengeri laban ke meri belanja RM200,000 sereta SABATI meri RM20,000 dikena nyendiaka pemeri kuih tu ke lalu bisi diberi ngagai 10 ejensi penerima,” ku iya.

Berebak enggau tu Fatimah mega beterima kasih ngagai 10 ejensi nya ke bisi nyendiaka kelai pengingat 2,000 bungkus ke diberi ngagai mensia mayuh ke bisi datai ngulu pengerami nya kemari.