KM: Bantu pengelantang pendiau deka dipajakka
KUCHING: Bantu pengelantang pendiau ungkup raban ke ditagit ba nengeri tu deka dipajakka perintah nengeri.
Kepala Menteri Datuk Patinggi Abang Johari madah, nengah polisi ke dipejalaika perintah nengeri deka mantu nyungkak penatai pemisi nengeri lalu pengawa beratka pengelantang pendiau rayat ulih dipajakka.
“Enda ngira nama bantu pengelantang pendiau, tetap deka terus diberi, deka dipajakka. Chukup kitai neruska, pemadu beguna nya ungkup rayat.
“Bantu tiap bulan deka dipajakka, nyema perintah besai ngetuka, kitai deka majakka,” ku iya lebuh dikerandau raban pengarang berita.
Dulu ari nya Abang Johari bejadika pengerami nyuaka ‘Sumbangsih Kuih Gawai Raya 2018’ ke diatur Opis Orang Indu enggau Ruang Bilik Sarawak (JWKS) ba Dewan Kunsil Nengeri ( DUN) Lama ditu, kemari.
Ambika chunto baka premiun tanah ku iya, ba sekeda kandang endu bisi orang kurang penatai pemisi lalu sida sebedau tu RM5,000 permium tanah.
“Diatu aku ngurangka ngagai 50 peratus lalu sida tu semina mayar RM2,500 premium tanah, nambahka nya sida mayar nya dalam timpuh 10 taun ti semina RM250 setaun ungkup tanah poin 13,” ku iya.
Nitihku iya tanah ti dikemansang ke tuju nya nyengkaum pengawa nimbuk tanah, ngaga parit, sereta nyambung ai udah dipejalaika ba Sungai Midin, Sungai Bedaun enggai di kemunyan ba Sibu.
Kelimpah ari nya lebuh ke ngenang pasal pengerami nya, Abang Johari nya muji pengawa ke dipejalaika opis nya ke ari baruh jaga Dato Sri Fatimah Abdullah nengah Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit.
Abang Johari madah, nya sebengkah ari chara dikena ngelai sereta meri terima kasih ngagai raban pengelikun enggau penerit adat ke gawa nyaga pengelikun enggau pengelantang menua.
“Maya bisi pengerami suah agi kitai berami enggau diri sebilik tang kekadang ba maya nya bisi sekeda raban pengelikun enggau penerit adat dikanggau diasuh gawa nyaga menua.
“Meri puji ngagai Dato Sri fatimah enggau tim iya laban ti meri pemeri kuih Gawai Raya ngagai ejensi penyelamat enggau penerit adat kitai.
“Perintah nengeri ari baruh iring aku deka terus meri pemeri tauka bantu pengelantang. Nyema bisi ejensi ke ditambah nerima pemeri tu taun baru, kitai mega deka nambahka bantu belanja,” ku iya.
Ba taun 2018, perintah nengeri ngungkupka belanja sepeyampau RM200,000 dikena nyendiaka pemeri Sumbangsih Kuih Gawai Raya. Nambahka nya SABATI mega bisi meri RM20,000 ke tuju nya.
Sama bisi datai ba pengerami nya, bini Abang Johari, Datin Patinggi Dato Juma’ani Tun Tuanku Bujang; Fatimah; Sapit Kepala Menteri Tan Sri Datuk Amar James Jemut Masing; Menteri Dagang temuai, Seni, Main Asal, Nembiak enggau Lumba enggau Main Datuk Abdul Rahman Hamzah, Direktor JWKS Noriah Ahmad sereta ke bukai.