Gaji menteri dikurangka 10 peratus Asil ari pemutus aum keterubah kabinet ti diatur Perdana Putra lalu dipersetuju bala menteri
PUTRAJAYA: Menteri Besai Tun Dr Mahathir Mohamad kemari mantaika gaji bala menteri dikurang sepenyampau 10 peratus berengkah diterit tekala nya.
Tu asil ari pemutus aum keterubah kabinet ti diatur Perdana Putra ditu kemari, ke alai bala menteri setuju gaji dikurang 10 peratus, ku iya.
“Tu nunjukka kitai siruka penanggul belanja menua,” ku iya rambau aum pengarang berita pengudah ngetuaika aum nya.
Dr Mahathir madahka pengawa mutung gaji 10 persin nya, belalauka gaji puku menteri.
Ditanya sekalika bisi pemesai kanan perintah deka dikaul ba pengawa mutung gaji, ku iya, tu bepanggai ngagai sida.
“Aku udah teleba baka tu laban lebuh aku nyadi Menteri Besai dalam taun 1981, pekara keterubah ti digaga aku iya nya mutung gaji menteri enggau mega pemesai kanan perintah ti nerima bayar lebuh tinggi ari bala menteri.
“Bepanggai ngagai sida (pemesai kanan perintah). Enti sida ngasaika diri deka nyaup ngurangka ungkus ngatur pengawa menua tu, sida tau ngaga baka nya. Kitai enda mejal sida,” ku iya.
Dr Mahathir nyadi menteri besai keempat Malaysia ari 1981 nyentuk 2003.
Bekaul enggau Peniki Gaji Ninting Taun (KGT) ngagai semua gawa perintah ti disemaya perintah sebedau tu, ku Dr Mahathir, “Kitai enda ditekul ngagai semaya sida. Semaya tu digaga (sida ti nyadi) penyakal diatu. Sida enda menang bepilih.
“Taja pia, kitai deka beratika chara ti positif sekalika sida (raban gawa perintah) patut diberi elawin tambah tauka pekara bukai, kitai deka bejalaika iya.”
Rambau Majlis Amanat Perdana Perkhidmatan Awam Ke-16 pada 4 April nyin tadi, ex- Menteri Besai Datuk Seri Najib Tun Razak madahka perintah setuju meri gaji niki sebaka penyampau siti KGT ngagai semua orang gawa perintah berengkah diterit kena 1 Julai 2018.
Berebak enggau nya, dikena ngemitka penyampauka staf perintah di menua tu dikena ngurangka belanja perintah, Dr Mahathir madahka perintah deka ngemaduka pengawa nyiri pemesai kunterik dichiri ari politik sebedau beratika baru sida ti bisi pemerat enggau begaji baruh.
Ku iya, bala pemesai enggau staf dichiri ari politik ke amat enda diguna tang semina deka meri peluang ngagai bala penyukung perintah sebedau tu.
Iya madahka urung 17,000 pemesai gawa kunterik iya nya dichiri ari politik enggau bisi antara sida udah nyadi staf mendam.
“Sida ti bepenatai pemisi baruh, kami deka ngambi sida gawa tang keterubah iya kami deka ngemaduka sida dulu,” ku iya, seraya meri jamin ke alai sida ti begaji baruh enda deka kena pangka.
Dr Mahathir madah pengawa maduka Datuk Seri Mohd Shukri Abdull nyadi Ketuai Pesuruhjaya Komiti Nagang Pengawa Makai Suap Malaysia (SPRM) laban iya ‘endang engkeman’.
“Kitai udah nyiri Shukri laban iya bepeneleba sereta iya ngaul diri ba pengawa mansik 1Malaysia Development Berhad (1MDB) tang iya diketuka gawa laban raban perintah lebuh nya enggai meda kereja digaga iya.
“Kitai nemu pekara tu, nya kebuah kitai bepenemu iya tu orang chukup engkeman nyadi Ketuai Pesuruhjaya SPRM,” ku iya. — Bernama
Tu nunjukka kitai siruka penanggul belanja menua. Tun Dr Mahathir Mohamad Menteri Besai