Do Ledoh Sungai Asap, Belaga 2018 disambut ari 25-27 Mei di Uma Balui Liko
BELAGA: Program Do Ledoh Sungai Asap, Belaga 2018, iya nya siti pengerami meri puji pengudah abis pengawa ngetau padi (Majlis Kesyukuran selepas menuai padi)ke digaga ngena jaku rambai “Menangen Urip Unak” (Nyaga Pendiau Lama) digaga baru lalu tu ke5 iya udah kala digaga, tang ke sekali tu, pengerami nya deka disambut kena 25 Mei, ke dikeramika dalam kandang dua hari di Uma Balui Liko, sitak pengentap baru Sg.Asap /Jematan Koyan.
Siku ketuai pupu bansa, Pemanca Umek Jeno madah, pengerami nya ke pemungkal iya kala digaga di Uma Bawang Sg.Asap Belaga dalam taun 2004, lalu taun kedua, dalam taun 2016 di Uma Nyaving, Uma Daro enggau di Uma Juman (2017).
“Pengerami Do Ledoh tu berat lalu entara pemerat nya, ngidupka baru sereta ngetanka adat pesaka, Adat Asal Puhu (bansa Kayan), enggau pesaka komuniti Kayan ngambika bisi dikeingatka ulih rebak baru jemah ila.
“Iya ukai baka ke dipadah ulih sekeda orang ke madahka kami tu arap ke pengarap lama, ukai bansa nya. Maya nyambut hari besai tu ila, pengawa gerija pan tau dipasukka baka ke kala digaga di Uma Daro sebedau tu,” ku Umek madah lebuh bechairmanka Aum Komiti Besai Pengerami Do Ledoh Sungai Asap 2018 di Uma Balui Liko, bedau lama tu tadi.
Kelimpah ari nya, siku Ketuai Komuniti, Penghulu Saging Bit bisi nyebut iya nya nyauka semua komuniti Kayan udah masuk mayuh macham pengarap kelebih agi Keristen.
“Pekara ke dipejuraika dalam aum tu bekait enggau adat pesaka komuniti Kayan lalu nadai besangkut paut enggau pengarap,” ku iya lalu nandu baru enda ngasuh komiti ngulai adat pesaka enggau pengarap.
Ba aum nya mega, Chairman Gerempung Maren Uma (MU) Sg.Asap, MU Duren Lihan madah, enti hari besai Do Ledoh enda di intu, dikirauka adat pesaka tu deka punas ngapa lalu enda ditemu ulih rebak baru.
Penyanding Penemu Komiti Pengatur Do Ledoh, May Lagiew nyadang ngambika pemayuh aktiviti, main, pekit ke disadang baka Pekit Pemakai Tradisional, Lumba enggau Main Rayat, Adat Pesaka, Anugerah Khas, pengawa pemerindang dikurangkan, tang betatika “Adet Dangei,” alai sida ke diau di Uma Balui Liko agi mengkang ngena adat “Dangei Lakusan”.
Kelimpah ari nya, ba lansa bukai, Chairman Kaban Komiti (AJK) Motivasi, Saging Utat madah program motivasi ke bala nembiak udah bisi digaga di Uma Juman taun siti nyin tadi lalu pengawa tu deka dipajakka, laban ba ditu meh alai iya meri peransang sereta motivasi ngagai rebak baru ke nyadi pelapis kitai jemah ila.
“Ke taun tu, bala penyereta ke bisi enggau program tu enda tau enda mai apai indai sida iya, lalu pengabis kurang pan, siku entara apai indai nya enda tau enda bebansa Kayan. Dikarapka bansa Kayan ulih bediri ba kaki diri empu tauka bediri sama tinggi, duduk sama baruh enggau pupu bansa bukai dalam kandang 10 ngagai 20 taun tu ila,” ku iya.
Sama bisi enggau ngulu aum tu mega, Sekretari pampang Parti PBB N. 66 Murum, Huvang Liah, Ketuai Publisiti pampang Parti PBB N.66 Murum Luhat Lihan, Ketuai Kampong Datah Layang Awing Igo,ketuai pupu bansa bukai enggau kaban komiti rumah panjai di Sg.Asap / Koyan.