Sekeda ejensi enggau palan opis perintah diketuka
PUTRAJAYA: Menteri Besai Tun Dr Mahathir Mohamad ngerintaika sekeda ijinsi bekait enggau Perintah diketuka kena ngurangka belanja Perintah.
Entara ke kena ketu nya, Suruhanjaya Pengangkutan Awam Darat (SPAD), Opis Hal Ehwal Khas (Jasa), Palan Inovasi enggau Kreativiti Global Malaysia (MaGIC), Majlis Profesor Negara ( MPN), enggau Komiti Pemansang sereta Pengelikun Genturung Pendiau Persekutuan (JKKKP).
“Mayuh ari palan tu, enti nitih ukai sebagi ari Perintah, ke patut nyadi penyanding penemu ngagai Perintah. Semua pekara tu deka dipadamka.
“Kitai enda begunaka pemintar sida iya, ba penemu aku, kitai pan bisi orang ke pintar,” ku iya madah ba aum media pengudah mungkal aum kabinet di Perdana Putra, ditu, kemari.
Iya madah pemutus ngemunaska ejensi nya dipejuraika dalam aum Kabinet nya ke betatika utang menua ke udah manggai RM1 trilion, nengah chara ngurangka belanja dalam bajet perintah sebedau tu.
Bejaku pasal madam SPAD, Dr Mahathir madah pengawa opis nya deka dipulaika baru ngagai Opis Menteri Pengangkut.
Bekait enggau pemanah runding madamka MPN enggau JKKKP, iya madah kededua palan nya bepelasarka politik ke dipegai ulih Perintah sebedau tu.
“Pemun iya suba, MPN sebuah gerempung ke dikena kita kena ngulihka pemadah ari orang ke pandai tang nyau pengujung iya, mayuh pekara bekait enggau politik dataika sida iya dikena nyukung Perintah. Nya alai, kitai enggai ngulang pengawa ke enda manah ke digaga ulih Perintah sebedau tu.
“Iya nandu baru madahka enti diperatika gaji ke dibayar ngagai JKKKP nyerumba penambah Perintah di sitak menua, lalu iya mayuh bekait enggau politik lalu ukai baka bejalaika menua. Lebuh madam ejensi tu, iya madah kitai bisi pegawai perintah bejalaika pengawa lalu kitai pan enda ibuh mayar ngagai JKKP laban enggai ngembuan politik baka Perintah sebedau tu,” ku iya.
Lebuh ditanya bekait enggau projek baka Bandar Malaysia, Tun Razak Exchange (TRX) enggau Lebuhraya Pan Borneo, Menteri Besai madah: “Kami agi mansik ni bagi ke patut dikinsil, lalu ni bagi ke patut dipajakka, lalu ni bagi ke anang guai digaga dulu datai ngagai maya ke patut.”
Dr Mahathir madah atur ngemunaska palan sereta mansik baru projek nya digaga sebagi ari atur ngurangka belanja Perintah ke udah manggai berbiliun ringgit.
“Kami udah nemu mayuh belanja dalam bajet ke lama, projek ke lama ke ulih dikurangka, penyampau nya bebiliun tang enda ulih dibantaika enggau silik agi.
“Ni naka belaja Perintah ke ulih dikurangka, tentu bisi projek ke dikinsil, bisi sekeda diketuka, lalu bisi sekeda, diperundingka baru kena ngurangka kos ni naka ke ulih dibayar Perintah,” ku iya. — Bernama