LBU betatika pengelikun penguna nengah jalai alun maya hari besai tu
SARATOK: Dalam pengelikuh sereta pengagau mensia mayuh nyambut hari besai, Gawai Dayak ti deka disambut ujung bulan tu sereta Hari Raya tengan bulan Jun, pemayuh kerita ke nengah jalai alun di serata menua tu pan majak nambah ari baka selama.
Baka kediatu, ba bagi jalai 64.486-kilometer, sebagi ari projek jalai Pan Borneo Highway, ari Sungai Awik di Saratok, Pelilih Menua Betong enggau simpang Bintangor di pelilih menua Sarikei Division diatu benung digaga.
Lebuhraya Borneo Utara (LBU) Sdn. Bhd. ke ngaga projek nya sekali agi bisi ngatur kimpin pengelikun jalai alun beserimbai enggau kededua hari besai tu.
Menijer Projek LBU Sdn. Bhd., Suhaili Salleh madah kimpin nya ti dipunka kena hari Dua tu tadi, di simpang jalai masuk ngagai Pasar Saratok digaga beserimbai enggau pengerami hari besai Gawai Dayak enggau Hari Raya Aidilfiri.
“Kimpin pengelikun jalai alun tu digaga betuju meri penemu ngagai semua bansa kelas pengguna ke nengah jalai Pan borneo highway kelebih agi maya kededua hari besai, Gawai Dayak enggau Hari Raya Aidilfitri nya disambut ulih mensia mayuh di menua tu, maya tu.
“Baka ke ditemu kitai, bebadi di jalai alun maya hari besai bansa tu sigi tinggi agi ari baka ngelama tu, laban mensia mayuh ke beguai pulai ngintu hari besai tu,” ku iya.
Iya nandu baru madahka laban maya hari besai bansa tu, mensia mayuh beguai pulai ke menua, ngujungka sida iya entara mensia mayuh ke deka napi penusah badi, lalu ketegal nya, LBU sdn. Bhd. betatika pemerat nge- mutarka pemayuh kerita sereta penyekut jalai nengah Perambu Pengatur Trafik (Traffic Management Plan) enggau sistem betatika pengelikun mensia mayuh di jalai alun, ku iya.
“Kami ngarapka kimpin tu nyadi lalau ngagai semua sida ke driba, nyaga diri empu, betatika pengelikun di jalai alun sereta bejimat lebuh mai kerita sida iya, kelebih agi nengah jalai Pan Borneo Highway ke mayuh benung digaga diatu,” ku Suhali.
Iya mega nyamin LBU sigi seruran betatika pengelikun mensia mayuh ke nengah jalai nya nyadi pemerat sida iya.
“Kami mega ngarapka semua driba deka meri kerejasama sida iya, bejimat, belubah lebuh nengah sitak jalai Pan Borneo Highway ke benung digaga diatu.
Sama bisi enggau ngulu Suhaili bejalaika kimpin jalai alun nya, Menijer Projek PPESW BPSB JV Sdn. Bhd., Michael Tan, Pegawai DOSH, Voon See Liong enggau pengari ari Indu Opis Polis Saratok (IPD Saratok) pampang Trafik.