DTTG ngarapka isu IPG Sarawak ti deka ditutup dipejurai ba Aum Dewan Rakyat

SIBU: Dayak ThinkTangk Group ( DTTG) minta Kaban Parlimen mai isu deka nutup Palan Pematih Pengajar ( IPG) di Sarawak maya Aum Dewan Rakyat udah tu ila.

DTTG diarika Wellie Henry Majang madahka piak sida balat ningkah opis menteri bekaul ti deka nutup IPG lebih agi IPG Rajang ketegal semina dia aja nyendiaka Ijazah Sarjana Muda Jaku Iban kenyau Januari 2013.

“Kitai nandu pekara tu ngambika Perintah Malaysia ke baru ari Pakatan Harapan nemu nama peminta rayat ba nengeri tu.

“Ari nya kitai minta Kaban Parlimen mantaika isu tu maya Aum Dewan Rakyat ila,” pia ku iya maya berandau enggau pengarang berita, kemari.

Nyema IPG Rajang ditutup, ku iya madah, tu deka ngemuntanka pengawa deka nambahka penyampau pengajar ti landik ba pelajar Jaku Iban.

Wellie madah, IPG Rajang udah ditumbuhka kenyau ari taun 1967 lalu nyadi ‘ ikon’ pelilih Meradong ti udah mayuh nempa pengajar ke gawa ba serata nengeri tu.

“Nya alai, kami ngansak piak opis menteri enggau opis bekaul ukai semina enda nutup tang pungka ngemanahka agi palan tu nyengkaum nambahka fasiliti ngambika seruran nempa mayuh agi pengajar nengeri tu empu.

“Kitai deka meda bagi 9: 1 pengajar di Sarawak laban kitai agi mengkang suntuk pengajar ari nengeri tu empu ngajar ti menua pesisir.

“Nyema ditutup tauka dilempaika tanggungpengawa bejalaika pengawa ke bukai tu deka nejuka kitai majak suntuk pengajar nengeri tu empu kelimpah sida mega tau diasuh ngajar ngagai menua ari luar Sarawak,” ku iya ti mega penengkebang DTTG.

Sebedau tu dipadahka IPG Rajang antara semilan ari 27 palan pematih di serata menua deka ditutup nyengkaum IPG Miri.

Perintah nengeri madahka diri bela enda setujuka pekara nya.

IPG Miri diberita deka digagaka palan Latih Pelajar Teknologi enggau Vokasional (TVET) dikena nyukung pemansang industri.