‘Seahorse Fun Festival’ deka diatur kena 21-24 Jun di Coco Cabana Marina Miri

MIRI: ‘Seahorse Fun Festival’ ti dilanggur deka diatur kena 21 nyentuk 24 Jun ila di Coco Cabana Marina Miri deka ngerichahka agi industri pemerindang ditu.

Menteri Muda Dagang Temuai, Seni enggau Main Asal Datuk Lee Kim Shin madahka tu mega ulih ngelakuka mengeri besai Miri ngagai temuai ari menua luar.

Raban pengatur madahka bisi peneleba besai dalam industri pemerindang sereta kala ngangauka artis tebilang menua ulih datai merin- dang.

“Seahorse Fun Festival antara program ti bepengulih mantaika penau bala nembiak ba pemerindang sereta pemadu beguna ngelakuka Miri ngagai menua luar,” ku iya rambau aum pengarang berita ditu.

‘ Seahorse Fun Festival’ deka mantaika panggau pemerindang pengelama enam jam nadai ngetu, karnival kaki lima, seksyen main nembiak mit enggau bangsal pemakai.

Ngelansa silik, Kaban Kunsil Nengeri (ADUN) Senadin nya pechaya program baka nya deka matak lebih 30,000 iku pengusung.

“Balat narit ati iya nya pemerindang Mr Bean ( Faiket Lauri) enggau Micheal Jackson Asia (Jordan Sam) ti deka matak penatai bala pengusung,” ku iya.

Lee ngarap mayuh agi bala nembiak nyereta ‘The battle of the band’ ari dalam enggau luar Miri ngambika bela begulai ngerichahka agi pengerami nya.

Ba lansa bukai, Ketuai Pekara Makit Gig Studio Entertainment Sdn Bhd, Mark Tan madah tikit tumu dijual berega RM15 seraya ungkup timpuh 5 nyentuk 20 Jun (RM20) lalu RM25 ba palan berami.

Sepenyampau 20 kaunter udah disediaka di Miri seraya 12 agi kaunter disedia di luar Miri nyengkaum Brunei, Bintulu enggau Kota Kinabalu.

Sama bisi datai iya nya Pengatur begulai Serakup Pedagang Anak Sarawak, Khalid Ashari enggau Direktor Fun Borneo Sdn Bhd, Ian Kuek sereta bala pengari pengatur ke bukai.