Laban nya deka nurunka penyampau rega barang enggau servis ti lalu ngurangka tating ba rayat menua tu
KUCHING: Menteri Dagang Temuai, Seni, Main Asal, Nembiak enggau Lumba enggau Main Datuk Abdul Karim Rahman Hamzah nyambut manah atur ke ulih ngurangka tating rayat, nyengkaum nurunka penyampau Chukai Barang enggau Servis (GST) ari 6% ngagai 0%.
Berindik ari penyampau GST ke diturunka ngagai 0%, Abdul Karim ngarapka orang dagang kelebih agi di nengeri tu ulih nitihka atur nya sereta ngurangka rega barang sereta servis.
“Enda ngira nama atur ti ngurangka tating rayat, kitai nyambut enggau manah.
“Nya alai, nama ke dikearapka aku ari orang dagang enti chukai tu diturunka ari 6% ngagai 0%, reti nya rega barang pan patut dikurangka sekalika engka dalam 10 sen, 20 sen.
“Laban enti rega enda diturun, pekara ke dipejalai sereta diperambu perintah nya (Pakatan Harapan) nadai mai pemanah.
Karim mansutka pekara nya lebuh dikerandau raban pengarang berita bekaul enggau penyampau GST ke udah diturunka Perintah Pakatan Harapan (PH) ari 6% ngagai 0% berengkah 1 Jun tu tadi.
Munaska GST entara isu sereta pekara dalam Manifesto Pakatan Harapan ba Pengawa Bepilih Besai Ke-14 (PRU14) ke diatur bulan Mei tu tadi.
“Kitai nyambut manah penyampau GST ke diturunka, isu nya dibai maya PRU14 lalu Perintah PH madah dalam manifesto sida deka munaska GST, tang nama ke dipeda kitai taja pan enda dipunas tang nyadi 0 ‘kosong’, nyadi nya lebih kurang sama,” ku iya.
Berebak enggau tu lebuh dipinta ngenang pengawa nurunka GST dalam industri dagang temuai, Abdul Karim mega ngarapka industri nya ulih nurunka rega servis enggau barang.
“Senentang industri dagang temuai pan sama, enti kitai tauka temuai datai ke hotel
Enda ngira nama atur ti ngurangka tating rayat, kitai nyambut enggau manah. Datuk Abdul Karim Rahman Hamzah Menteri Dagang Temuai, Seni, Main Asal, Nembiak enggau Lumba enggau Main
suba bisi 6% lalu diatu nadai agi 6%, nyadi sida hotel patut ulih ngurangka nya. Enti temuai datai ngirup ba hotel patut nadai agi 6%.
“Tu ambis nadai bisi ngurangka tating sekalika ngagai temuai tauka rayat menua tu empu, tu atur ke manah,” ku iya.
Sama datai nyempulang Karim ngagai pengerami nya, Menteri Muda Nembiak enggau Lumba enggau Main Datuk Snowdan Lawan; Sapit Speaker Kunsil Nengeri Dato Gereawat Gala, Presiden DCCI Datuk Joseph Salang Gandum enggau ke bukai.