SST dikearap meri penatai pemisi ngagai menua: Salang
KUCHING: Enda ngira nama ti dikena Perintah Pakatan Harapan nukar Chukai Barang enggau Servis (GST) ila, dikearapka ulih meri asil ngagai menua sereta ulih dipulaika baru ngagai rayat.
Presiden Balai Dagang enggau Industri Dayak ( DCCI), Datuk Joseph Salang Gandum ngarapka pekara ke dikena nukar GST nya meri penatai pemisi ti chukup dikena bejalaika pemansang.
“Penemu tauka runding ke diatu iya nya deka nentuka kitai bisi penatai pemisi ke chukup ke tuju bejalaika pemansang. Enti enda pia, tebal agi asil penatai pemisi nya dikena melanja operasyen, nya ke dikeirauka kitai.
“Aku ti kala nyadi kaban parlimen ungkup menua pesisir, aku meda asil ke digumpul ari GST nya ke belanja pemansang.
“Diatu Perintah (Pakatan Harapan -PH) minta 3 bulan endur meda nama lalu bakani sida ulih bejalaika SST,” ku iya ti siku ari orang ke nyukung GST dipejalaika maya ba parlimen.
Salang ti kala nyadi Kaban Parlimen Julau mansutka pekara nya lebuh dikerandau Utusan Borneo bekaul enggau ubah GST ari 6% ngagai 0%, pengudah iya tembu ngulu pengawa bejadi palan 11 Ridgeway ditu, kemari.
Palan endur ngatur aktiviti raban bansa 11 Ridgeway ti ditumbuhka Fiona Mar- cus Raja enggau Desmond Wong mujur dipenyadika Menteri Dagang Temuai, Seni, Main Asal, Nembiak enggau Lumba enggau Main Datuk Abdul Karim Rahman Hamzah.
“Diatu penyampau GST 0%, kitai semina ngarapka orang dagang ulih ngurangka rega nitihka pematut,” ku iya.
Menteri Besai Tun Dr Mahathir Mohamad dalam aum pengarang berita di Putrajaya kena 30 Mei tu tadi madahka GST deka kinsil dalam bulan September taun tu sereta diganti ngena chukai jual enggau servis (SST).
Berengkah 1 Jun, GST deka nyadi kusung (0%), ku iya.