‘Kitar semula’ sereta nyaga rampa menua mantu perintah ngelimat belanja: Dr Sim
KUCHING: Menteri Opis Kandang Menua enggau Pengawa Berumah, Datuk Dr Sim Kui Hian ngelalau rayat di Sarawak ngemeranka ulah bekenaka baru barang ( kitar semula) lalu nyaga rampa menua tu laban iya ulih mantu Perintah nyimatka belanja.
Ku iya, tu laban palan alai munaska uras deka ngena ungkus urung RM10 juta, siti penyampau belanja kena Perintah ngemutarka uras menua tu.
Kelimpah ari nya, Dr Sim madah baka kompeni ke ngemutarka uras baka Trienekens ngeletakka rega urung RM250 setan kena ngumpul uras di Kuching, lalu tu tentu deka mantu Perintah enti rayat Sarawak berengkah ngembuan ulah bekenaka baru barang enggau aktif berengkah ari diatu.
Berindik ari nya iya madah, udah maya iya rayat Sarawak nemu pasal pemerat bekenaka baru barang lalu nyaga pemeresi rampa menua laban iya deka nguntungka Sarawak.
“Enti kitai deka nyaga Sarawak, kitai meseti nyaga pemeresi. Iya bepun ari rayat enggau ulah sida iya laban nyaga pemeresi tu mega mandangka kitai sayau ke menua kitai ( Sarawak),” ku iya madah lebuh bejaku ngepunka Kimpin Operasi Kitar Semula di Palan bebeli Barang di tHe Spring ditu, kemari.
Ba atur pengawa nya mega, Dr. Sim meri puji ngagai semua ke udah bejalaika pengawa meransang bekenaka barang baru lalu mansutka penemu ke inovatif bekenaka baru barang baka ke digaga ulih Palan bebeli Barang tHe Spring.
Ba atur pengawa nya mega, Palan Bbeeli Barang tHe Spring bisi meri kelala injin ngatika diri empu bekenaka barang baru ke ulih mantu mensia mayuh nyimpan barang ke ulih dikena baru baka tin aluminium enggau butul plestik.
“Anang ngenggaika pengawa bekenaka barang baru baka siti butul plestik laban pengawa bansa nya taja iya mit, deka ngaga menua tu endur diau ke manah agi ke rebak baru,” ku iya.
Sama bisi enggau ngulu ngepunka atur pengawa nya, Menijer Besai tHe Spring Management Services Sdn Bhd Datin Christine Ling.