Lelaki Indonesia benung miki bot berikan nyangka parai kena kipas injin
KUCHING: Siku lelaki Indonesia ke dipadah parai dipelabaka bisi kena kipas injin sebuah bot berikan ke benung dibiki iya di Sungai Tabuan, Pending ditu, kemari.
Ketuai Polis Pelilih Menua Kuching ACP Ng Ah Lek madah penusah nya nyadi dalam urung pukul 10 pagi lebuh bot berikan nya rusak lalu seiku ari kru bot nya nurun lalu meresa bot nya.
“Udah krew nya meresa, kapten bot nya lalu ngidupka injin sebedau sida iya nemu bisi bekau darah di dalam sungai lalu sida iya udah nya, nemu laki nya nadai agi dalam bot nya.
“Dipelabaka lelaki nya nurun ari bot nya lalu nyangka bisi kena kipas maya injin bot nya diidupka,” ku Ng madah nengah siti penerang ditu kemari.
Iya nandu baru madahka, bala pangan lelaki nya, udah nya nurun ngiga lelaki nya tadi di dalam sungai tang enda mujur lalu ngeripot pasal pekara nya ngagai polis.
“Lelaki ke lenyau lalu tenggelam nya dipelabaka udah parai,” ku iya.
Operasi ngiga sereta nyelamat (SAR) lelaki nya, bela dibantu ulih Opis Bomba enggau penyah Penusah Malaysia (JBPM) Sarawak sereta Raban Polis Marin (PPM) bela enggau ngiga lelaki nya.
Lelaki nya dikelala enggau nama Herianto Ramli, 53 taun lalu datai ari Singkawang, Indonesia.
Orang ke bejaku ngarika JBPM madahka urung semilan iku raban Bomba betuaika Ketuai Balai Bomba enggau Penyelamat (BBP) Tabuan Jaya sama bisi enggau Operasi SAR tersebut.
“Pengawa nyelam agi digaga ngiga lelaki nya,” ku iya.
Lelaki ke lenyau nya, datai ke berita tu ditulis lalu bedau ditemu lalu operasi SAR agi dipejalaika.