Semua komuniti kelebih agi raban nembiak dipinta besaup ngangkatka nengeri tu nyadi palan mandangka main asal
KUCHING: Opis Menteri Dagang Temuai, Seni, Main Asal, Nembiak, Lumba enggau Main deka chakah ngelakuka dagang temuai Sarawak nyadi palan main asal, seni sereta pengeraja asal.
Menteri Dagang Temuai, Seni, Main Asal, Nembiak, Lumba enggau Main, Datuk Abdul Karim Rahman Hamzah madahka opis menteri iya enda ngelaku tauka ngangkatka industri dagang temuai nengeri tu nyadi palan bebeli barang.
Berindik ari pekara nya iya ngarapka orang ke rinduka main asal, seni sereta pengeraja asal kelebih agi raban biak nyaup ngangkatka industri dagang temuai nengeri tu.
“Aku sereta opis menteri enda nyual Sarawak nyadi palan bebeli barang, kitai deka nyual Sarawak nyadi palan main asal, seni nyengkaum palan pengeraja asal.
“Kitai begunaka mayuh agi orang ti rinduka seni sereta main asal laban aku arap bendar nengah chara tu kitai ulih ngemansangka baka main asal kitai,” ku iya.
Abdul Karim mansutka pekara nya lebuh bejaku seraya bejadika palan 11Ridgeway ba Jalan Ong Tiang Swee ditu, kemari.
Palan 11Ridgeway ti dipun tauka ditumbuhka Fiona Marcus Raja enggau Desmond Wong, sebengkah palan pemadu baru ke ulih endur raban bansa ngatur pengerami sereta woksyop, sereta ulih nyadi palan endur orang sesiku tauka gerempung ngiga sereta bekunsi penemu.
11Ridgeway deka bekerejasama enggau raban bansa, ngenegapka raban nembiak, ngangkatka dagang temuai, meransang aktiviti sereta ngelakuka pengawa nyaga main asal enggau seni Sarawak.
Lalu nyerumba pengawa bejadika palan nya kemari, bengkel Sape enggau bengkel batik bisi diatur kelimpah ari ‘Facebook Live’.
“Kitai meri puji ngagai orang dagang biak laban ti bisi penemu sereta ulih numbuhka palan tu. Kitai ngarapka endur tu ulih dikena alai ngatur pengerami tauka aktiviti ke manah sereta meri penguntung.
“Palan tu ulih nyadi palan main asal, seni kelimpah ari alai ke ulih endur ngiga sereta bekunsi penemu sereta ke bukai,” ku Abdul Karim.
Sama bisi datai ngagai pengerami nya kemari Menteri MudaNembiakenggauLumba enggau Main Datuk Snowdan Lawan, Sapit Speaker Kunsil Nengeri Dato Gerawat Gala, Chairman Majlis Pebandaran Kota Samarahan Dato Peter Minos sereta ke bukai.