Sarawak meseti bebendar negika hak ba pemansut petroleum: Dennis
MIRI: Sarawak enda patut nangika kes saman digaga Petroliam Nasional Berhad (Petronas) tang patut berani nyingkang ke mua ngetanka hak ba pemansut petroleum.
Kaban Kunsil Nengeri (ADUN) Telang Usan, Dennis Ngau madahka Sarawak ngembuan pemansut minyak enggau gis ti asil iya tau dikena ngemansangka infrastruktur di nengeri tu.
“Rayat Sarawak patut begempung sereta angkat nyukung pengawa perintah nengeri ngetanka hak Sarawak ti dikembuan dalam konsitusyen nyengkaum pemansut minyak enggau gis,” ku iya ditu kemari.
Petronas ba sebengkah penerang madah sida udah nganjung peminta di Kort Besai dikena ngulihka kenuku ke alai Akta Pembangunan Petroleum 1974 (PDA) nyadi undang-undang ti dikena ba industri petroleum di menua nyengkaum Sarawak.
Ngelansa silik, Dennis betanya nama kebuah isu nya baka sengaja dibantai pengudah perintah betukar jari.
“Ba penemu aku empu baka ulih ngasaika bisi ansak ari sekeda raban ba kes saman tu, nama kebuah PDA patut diserenih baru diatu lalu enda digaga rambau pegai perintah ke dulu,” ku iya madah nyemetak.
Nitih ku iya, pinta royalti sepenyampau 20 peratus perintah nengeri ngagai pemansut minyak enggau gis mega nyentuk diatu bedau diputarka perintah besai.
Tandu iya, bayar royalti lima peratus ari rega asil petroleum ti dibai pansut ari dalam enggau luar tebing tasik Sarawak ari Petronas ngagai perintah nengeri baka ti dipesetuju dalam PDA enda chukup.
“Bayar royalti lima peratus ngagai nengeri tu iya nya baruh lalu enda patut, nya kebuah kitai dekaka perintah besai ngamatka peminta bayar royalti 20 peratus tauka lebih ngagai Sarawak,” ku iya nerang.
Nya alai, Dennis andal perintah nengeri deka naka ulih gawa memanah ngetanka hak Sarawak ari diambi sepeneka ati sarikat minyak nasional nya.
“Aku endang ngelempaika pengandal tinggi ngambika pemutus manah bepiak agi ngagai Sarawak ngambika perintah nengeri ngatur empu pemansut minyak enggau gis nengah Petros,” ku iya.
Tambah mega, asil ari industri minyak enggau gis tau dikena ngerichahka agi projek pemansang infrastruktur pulaika pemaik rayat Sarawak empu. SIBU: Raban Parti Tindakan Demokratik ( DAP) bela enda muai awak ngabang Gawai Dayak ngagai beberapa buah rumah panjai ba Parlimen Sibu.
Pengawa ngabang tu diuluka Kaban Parlimen ( MP) Sibu Oscar Ling.
Sekeda rumah ke ditiki ngabang maya tu iya nya rumah Direktor Imigresen Nengeri Ken Leben enggau Presiden Sarawak Iban Annual Conference ( SIAC) Reverend Steward Damat.
Kelimpah berami Gawai, Ling dipebasa bela ngemujurka pengawa miring ba sebuah rumah panjai.
Awak tu bela dikena iya bekunsika penemu bekaul enggau reformasi ti udah ditumbuhka perintah baru Pakatan Harapan (PH) nga- gai peranak rumah panjai. Nambahka nya, i ya nerang ngagai sida bekaul enggau polisi ke baru ti deka ditumbuhka PH nangkan ke tu ila.