KPDNKK dipinta nentuka pedagang nadai agi minta GST kelebih agi di menua pesisir

MIRI: Opis Menteri Dagang Dalam Menua, Koperasi enggau Orang Bebelika Barang (KPDNKK) diansak matau pejalai pengawa nadai ngenaka Chukai Barang enggau Servis (GST).

Kaban Kunsil Nengeri (ADUN) Telang Usan, Dennis Ngau madahka kebuah pia laban rega barang di kandang menua ulu nadai nunjukka bida kenyau ari ‘sifar GST’ kena 1 Jun tu tadi.

“Raban Penerit Adat KPDNKK ditangkan anang semina matau gaya rega barang di pasar besai, kedai renchit enggau pasar basah di mengeri aja tang mega di menua ulu,” ku iya madah ngagai Utusan Borneo kemari.

Dennis ngaku rega barang di kandang menua ulu agi sebaka taja GST udah diketuka berengkah ari 1 Jun lalu pekara tu patut diperatika raban KPDNKK.

“Kitai enggaika pengawa nginsil GST tu semina dipejalai di mengeri tang di menua ulu, menua pesisir rega agi sama lalu mar ti nating rayat,” ku iya madah nyemetak.

Ku iya, nitihka pematut rega barang mudah agi sereta ulih dibeli pengudah nadai GST tang pekara nya nadai baka ti dikeandalka rayat.

Dennis ngaku suah nerima sebana enggau jaku pejah enggau penerang iya bekaul enggau GST nadai meri pangka ngagai peranak menua pesisir.

Tang raban ti suah naburka petenah enggau jaku pejah ngagai iya diatu diau diri pengudah perintah Pakatan Harapan (PH) tetap neruska Cukai jualan dan perkhidmatan (SST) September tu ila.

“Pejalai ‘sifar GST’ aja enda deka mutarka penanggul belanja idup rayat niki enti nadai mekanisme timpuh panjai.

Pengawa bejalaika baru SST sepenyampau 10 peratus kena September tu ila tentu deka meda rega barang enggau servis niki baru,” ku iya.

Nitihka logik iya ku Dennis, nadai sebarang pengilang ti sedia nanggung belanja SST kediri nadai ngelepas ngagai pengguna.

“Penanggul rega niki ukai pekara baru, suba kitai kala napi penanggul rega barang niki sebedau GST bisi dipejalai.

Nya alai, kitai nyakap perintah PH nurunka rega barang sebedau pejalai GST tiga taun ke udah,” ku iya.