Projek sepital ‘sakit’ Petra Jaya deka diserah ngagai Opis Kereja Raya
KOTA SAMARAHAN: Opis Kereja Raya ( JKR) deka diberi tanggungpengawa nampung sereta bejalaika projek ‘sakit’ Sepital Petra Jaya, ti dikearapka ulih nembuka projek nya enggau lengkas seraya dikena mutarka penyekut ba Sepital Besai Sarawak (HUS).
Menteri Pengerai Malaysia, Dr. Dzulkefly Ahmad, madahka nya berindik ari kunteriktor ti ngaga projek nya diatu dipelaba deka diketuka.
Pemutus nya digaga ku iya, pengudah ti ngabas kediri empu projek sereta asil ari aum Opis Menteri Pengerai Malaysia (KKM), Opis Pengerai Nengeri Sarawak, JKR sereta ke bukai ti bekaul, ti merambu ngambika kunteriktor ke diatu diketuka.
“Dalam aum entara kami KKM, Opis Pengerai Sarawak, JKR Malaysia tadi udah ngaga pemutus sereta meri perambu ngambika kunterik Zecon Bhd diketuka, lalu JKR Menua deka nganti sereta bejalaika tanggungpengawa nya.
“Perambu tu deka dipejuaraika ngagai Opis Menteri Wang enggau aum kabinet. Aku empu deka meri penerang tauka bejuraika silik pasal projek ‘sakit’ tu aum kabinet pagila (sehari tu).
“Pejalai projek tu naka Jun 2018 semina 34.54 peratus. Kereja struktur bedau tembu nyentukka diatu. Entara empas pengelubah sepital tu tembu mai penyekut ba wad tambah HUS, ti enda ulih enda dibuka dikena nangkup pemayuh pesakit ba ‘Jabatan Kecemasan’ sereta katil ditusun kelalu semak,” ku iya. .
Iya mansutka pekara nya dalam aum pengarang berita pengudah nemuai seraya bejalaika pengawa keterubah nyadi menteri ngagai Palan Tungkul Ati Sepital Besai Sarawak (HUS) ditu, kemari.
Tumu pagi kemari, iya ngawakka diri ngabas projek Sepital Petra Jaya iya nya ke endang tuju penemuai iya ke mengeri tu, seraya dis- empulang Menteri Kaunsil Kandang menua enggau Pengawa Berumah, Datuk Prof Dr. Sim Kui Hian.
Projek ngaga Sepital Petra Jaya tu berengkah 23 Mei 2013 sereta haribulan asal tembu 29 November 2016.
Ku iya, laluh bayar projek tu iya nya RM350 juta.
Taja pia, kunteriktor arap bendar ulih nembuka nya dalam bulan Disember 2018, tang kitai enda arap sida ulih nembuka maya nya, ku iya.
“(Bekaul enggau kunteriktor) Nadai milih baru laban nya deka begunaka timpuh sereta nadai proses tinda laban nya begunaka timpuh panjai. Nya alai nama ke diperambu kami, JKR empu enggau pengulih sereta pengelandik sida,” ku iya
Ditanya sekalika chara ke sama dikena napi sereta mutarka projek ngaga Sepital Sri Aman, iya madah, dipelabaka urung 23 projek sepital sereta klinik di serata menua nyengkaum Sepital Sri Aman ke baru ti dikelai zon merah, dipelabaka deka diputarka baka mutarka penanggul projek Sepital Petra Jaya.
Kelimpah ari nya Dr. Dzulkefly madahka dalam aum nya ngemutuska chara dikena napi enggau penanggul kereban sepital, iya madah KKM melaba deka bejalaika chara timpuh pandak iya nya chara ‘outsourcing facilities’, nyengkaum kereban baka katil bebuntas enggau kebukai.
Nitih ku iya pakar sepital perintah deka ngena baka reti nyuwa kereban sepital peribit, nya alai kerejasama sepital peribit amat beguna.
“Kitai ngarapka sepital perintah enggau sepital peribit ulih bekerejasama. Kitai ngarapka sepital peribit enda ngechaj kitai ngena rega ti tinggi,” ku iya.
Sama bisi kemari Dr. Sim, Direktor Opis Pengerai Nengeri Sarawak Dr. Jamilah Hashim, Direktor Palan Tungkul Ati HUS Samarahan Dr. Mod Asri Riffin enggau ke bukai.