MP GPS tetap ngaul semua menteri kabinet ngambika ulih nyambung pemansang di Sarawak
MIRI: Kaban Parlimen Gabungan Parti Sarawak ( GPS) deka majakka pengawa negutka agi kaul enggau semua menteri kabinet, ngambika ulih nyambung pengawa pemansang kelebih agi di Sarawak.
Kaban Parlimen (MP) Sibuti, Lukanisman Awang Sauni madah, tu nyengkaum bekerejasama enggau dua iku menteri ari Sarawak ke dipilih nyadi Menteri Kereja enggau Sapit Menteri Dagang Dalam Menua enggau Pekara bekait enggau Pengguna.
“Kami nyukung penuh pilih MP Selangau Baru Bian enggau Parlimen Stampin Chong Chieng Jen, ke ngarika Sarawak dalam rintai kabinet,” ku iya madah ditu, kemari.
Baru Bian udah ngangkat sumpah pangku pengawa lalu betatika pengawa iya nyadi Menteri Kereja lalu Chong Chieng Jen dipadu nyadi Sapit Menteri Dagang Dalam Negeri enggau Pekara bekait enggau Pengguna.
“Kami sigi ngarap endar rintai menteri kabinet majakka agenda pemansang rayat kelebih agi mai mayuh agi pemansang ke Sarawak kelebih agi di menua pesisir,” ku iya.
Lukanisman madah nyadi MP, iya deka nyukung semua atur ke digaga ulih perintah Pakatan Harapan ( PH) seagi-agi iya meri penguntung ngagai rayat Sarawak.
“Kami mega minta Perintah agi mengkang ngetanka atur nyadi pengelantang pendiau rayat baka bantu ke rayat, rumah, ngemanahka agi infrastruktur menua pesisir sereta mayuh macham pemansang bukai,” ku iya.
Ku iya, Parlimen Sibuti mega begunaka Program Pengawa Berumah ke Rayat (PPR) di sitak Niah lalu ngarapka perintah baru tu berundingka pekara nya.
“Kami mega pechaya Baru Bian ulih bejalaika tanggungpengawa iya nyadi Menteri JKR sereta beratika projek Pan Borneo tembu sereta nambah mayuh agi jalai alun di menua pesisir,” ku iya.
Lukanisman mega meri jaku puji ngagai Baru Bian enggau Chong Chieng Jen ke udah dipadu dalam rintai kabinet menteri.
“Tuduh pangku pengawa ke seduai iya deka mai wang turu ke pemansang Sarawak, lalu kami ke nyadi Kaban Parlimen penyakal deka bekerejasama ke pemansang menua tu,” ku iya.