Dua pekara deka diberi pemerat, infrastruktur jalai enggau sekula jai baruh pegai KKRM
KUCHING: Dua pekara deka diberi pemerat ulih Menteri Kereja baru Malaysia, Baru Bian lebuh iya seharitu baru berengkah ngepunka pengawa iya mangku pengawa nya, iya nya infrastruktur jalai di serata menua Malaysia nyengkaum jalai baruh pegai Perintah Besai enggau Pan Borneo Highway sereta sekula jai tauka lama ke patut digaga tauka biki, baruh pegai Opis Menteri Kereja (KKRM).
Kaban Parlimen ( MP) Selangau ba aum pengarang berita keterubah iya bechairmanka iya empu lebuh penatai iya ngagai Opis Menteri KKRM kemari disempulang ulih Sapit Menteri KKRM Anuar Tahir enggau Kepala Sekretari KKRM, Dato Sri Zohari Akob begulai enggau ketuai bukai diberi licha bekait enggau struktur opis menteri, kuing sereta pemerat bekait enggau kuasa ti diberi ngagai KKRM.
“Sekeda sekula ke udah lama tauka jaik ke di rikod di serata menua tu mayuh di Sabah enggau Sarawak, lalu pekara tu suah endar diangkatka aku empu di Aum Kunsil Nengeri Sarawak (DUN).
“Taja pia, aku teperansang endar ati enggau sekeda projek ke diberi ngagai KKRM naka kediatu, ke nyentuk endar ba pengawa ngaga sekula tu, ukai semina sekula lama tauka ke udah jaik di Semenanjung Malaysia tang mega di Sabah enggau Sarawak, lalu ukai semua mega baruh pegai KKRM tang mega bekunsi enggau Opis Menteri Pelajar (KPM),” ku iya lalu nandu baru, muji rikod KKRM naka kediatu manah endar, laban semua projek ke diberi ngagai KKRM, digaga enggau mujur.
Iya madah munyi nya ba aum pengarang berita di KKRM di Kuala Lumpur, kemari ba hari keterubah iya masuk ke opis KKRM.
Pemayuh sekula jai sereta ke patut dibiki ulih KKRM di serata menua Malaysia, di Semenanjung aja (158), Sarawak (50) enggau Sabah (37).
Ari sukut infrastruktur ku iya, ukai semina lima buah menua meskin aja ke napi infrastruktur jalai ke enda berapa manah. Kuasa KKRM ba infrastruktur jalai di menua tu mungkur Lebuhraya Federal, jalai di Semenanjung, jalai ngagai penyangkai kapal, padang bilun sereta jalai nuju palan pelajar tinggi.
“Pemerat opis menteri tu ke lima buah sitak menua ke enda ngasaika infrastruktur ke manah. Aku mega bisi dipadah, jalai ba menua baruh pegai Perintah Menua, Perintah Besai pan bisi hak.
“Taja pan baka Sabah enggau Sarawak, semina Pan Borneo Highway (PBH) benung digaga, tang kami pan bisi jalai bukai ke patut dijaga baka jalai ke nyambung ngagai pasar mit, jalai ngagai menua ulu ke mayuh di Sarawak baka Long Semadoh, Ba’kelalan, Kapit sereta sitak menua pesisir bukai,” ku iya.
Jalai baruh pegai Perintah Besai ku iya berat tang bajet ke diberi kelalu mimit.
“Nitih ku KSU KKRM madahka opis menteri nya suah endar minta bajet ditikika, pengabis kurang pan RM2 biliun tapi kami semina nerima entara RM600 juta ngagai RM800 juta setaun, lalu tu enda datai 50 peratus ari bajet ke diberi ngagai kami.
“Udah tu ila, bajet nya enda tau enda disengkaumka baru kelebih agi kena miki tauka nyaga jalai Perintah Menua ke bisi kaul enggau Perintah Besai. Baka di Sarawak aja, 30 peratus nya jalai ke diempu ulih Perintah Besai ke balat endar jai.
“Ba kami di Sarawak/Sabah, ungkup nya enda sama bela laban baka Sarawak, iya sebuah sitak menua ke besar endar lalu jalai pan panjai ke enda tau enda dibiki lalu nambah enggau nya pemayuh mensia ke diau di sitak nya pambar. Patut ungkup ke kami diberi mayuh agi, ku iya.
Nitihka rikod ke diterima Baru, peratus penemu jalai PBH ke udah tembu, ke Renggat Pemungkal, ke semua 11 pakej benung digaga, lalu kediatu pan pemansang ngaga PBH, benung digaga, alai ke semua renggat nya manggai 36 peratus.
Kelimpah ari nya, Baru ti mega nyadi ADUN Ba’kelalan berasai temegah ati mungkal pengawa iya nyadi Menteri Kereja kemari, lalu seiku pupu bansa Lun Bawang ke nyadi Menteri penuh kabinet Pakatan Harapan (PH) baru pegai Menteri Besai (PM)Tun Dr. Mahathir Mohamad.
“Mayuh endar utai ke patut dipelajar, aku nguji meretika konsep KKRM... sekeda pekara ke bisi dibantaika lalu nyangka deka terus dipajakka.
“Aku tekuing endar ati enggau siti pekara pasal Sistem Ngaga Rumah bepelasarka Industri (Industrialised Building System tauka IBS) ke digaga ulih opis menteri tu ngelamatu. Reti nya projek Perintah enda tau enda nitih atur sistem IBS,” ku Baru.
Iya nandu baru madahka sistem IBS mai mayuh penguntung, lalu siti ari pemerat nya, ngurangka kos ngaga rumah.
“Kitai enda ibuh kelalu bepanggai ba pengereja pengawa ari menua luar, kurangka pengereja pengawa menua luar, lalu tu kuing ke manah.
“Kedua, ketegal penguntung tauka asil ngena IBS, opis menteri tu merambu ngambika swasta tau nguji projek tu kelebih agi ungkus projek ke lebih ari RM50 juta ke atas,” ku iya.