Ngambika tuju ti deka ngelancharka proses ngajar enggau belajar ulih dijapai
SIBU: Perintah dipinta nentuka perambu ti deka meri pemendar ngagai nembiak sekula mai gajet ke sekula ungkup tuju nyadika malin ba pengawa ngagajar enggau belajar enda salah kena sida ke pengawa ti enda menuku.
Mandal Chairman Opis Nagang Pengawa Salah Malaysia (MCPF) Tan Sri Lee Lam Thye nyemetak madahka gajet tu meseti semina dikena ngemanahka proses pengawa ngajar enggau belajar.
Sentang pekara tu, iya nyukung penuh penemu Meteri Pelajar Dr Maszlee Malik ke madahka opis menteri tu patut nyerenih baru perambu nya sebedau ngemendarka nembiak sekula mai gajet ke sekula.
“Sentang hal tu, aku deka ngelalau, nyema perambu tu dipejalai jemah ila, ngarapka bala nembiak sekula enda salah kena perengkaguna tu. Nya meseti dikena ungkup ngulihka penemu dalam Sains, Teknologi enggau Dagang sereta pemerindang ke manah.
“Peluang tu enda ulih dikena enggau pengawa negatif baka akses ngagai ‘website’ ke enda tauka ngembuan gambar ke enda manah,” ku iya madah lebuhka ditanya pengarang berita kemari.
Iya nandu bekaul penerang ke diapadah Maszlee ti madahka Opis Menteri Pelajar deka nyerenih baru perambu ti ngemendarka nembiak sekula mai gajet ke sekula ungkup tuju ngaga malin lebuh ba pengawa ngajar enggau belajar.
Ku Lee, opis menteri patut berati ari genap sukut sebedau perambu nya dikemendar nyengkaum aspek pengelikun, isi guna sereta infrastruktur.
Iya nandu madahka, endang setuju enggau ngena perengkaguna teknologi baru tu di sekula ungkup ngulihka penemu seriris enggau pemansang jeman digital.
Tu kebuah teknologi baru tu deka ngemuntangka proses ngajar enggau belajar di sekula.
Taja pia, ku iya, endang patut nentuka semua pekara ti diguna udah disediaka dikena nentuka sambung internet nyengkaum sistem ‘Wi-Fi’.
Ku iya tu pekara ti berat nentuka pejalai perambu tu bejalai enggau manah nitihka ti dikearap.
Sentang hal tu, aku deka ngelalau, nyema perambu tu dipejalai jemah ila, ngarapka bala nembiak sekula enda salah kena perengkaguna tu. Nya meseti dikena ungkup ngulihka penemu dalam Sains, Teknologi enggau Dagang sereta pemerindang ke manah. Tan Sri Lee Lam Thye Mandal Chairman MCPF