Penyampau kes bebadi bisi nurun sekumbang ‘Op Selamat Ke-13’ dipejalaika
KUCHING: ‘ Op Selamat Ke-13’ nyerumba Pengerami Hari Raya Aidilfitri Taun 2018 ngayanka penurun ba penyampau semua penusah bebadi ba jalai alun, enti dibandingka enggau Ops pengerami ke sama taun nyin kemari.
Ketuai Opis Nasat & Penerit Adat Trafik Kontinjen Sarawak, Supt Alexson Naga madahka Op Selamat Ke-13 nya berengkah 8 Jun ngagai 22 Jun tu tadi, pengelama 15 hari.
“Bepelasarka statistik ulih diperatika Op Selamat Ke13 nyerumba pengerami Hari Raya Aidilfitri Taun 2018 ngayanka penurun ba penyampau semua penusah bebadi ba jalai alun iya nya ari 692 kes ba Op Selamat 11/2017 nyerumba pengerami Hari Raya Aidilfitri 2017 ngagai 680 kes Op Selamat Ke-13 (2018).
“Tu ngayanka penurun sepenyampau -12 kes tauka -1.7 peratus.
“Ba semua nya, Op Selamat 13/ 2018 nyerumba pengerami Hari Aidilfitri udah bejalai enggau lanchar sereta teratur,” ku iya nengah penerang berita iya.
Iya madahka Op Selamat nya dipasuk tauka disereta urung 850 iku pegawai eng- gau anggota polis ba Kontinjen Sarawak ke udah mujur nentuka pengelikun penguan jalai alun ba nengeri tu.
Nitih ku iya, ba penyampau kes bebadi ba jalai alun lalu nabanka nyawa sekumbang timpuh Op Selamat Ke-13 nya enti dibandingka enggau Op Selamat 11/2017, penyampau kes bisi nurun 13 kes tauka 23.1 peratus iya nya ari 13 kes (Op Selamat 11/2017) nurun ngagai 10 kes ba Op Selamat 13/2018.
Penyampau kes mati mega nurun sepenyampau -3 kes tauka -23.1 peratus, iya nya sepnyampau 13 kes pemati sepemanjai Op Selamat 11/2017 dibandingka enggau timpuh ti sama ba Op Selamat 13/2018 bisi 10 kes mati.
“Kebuah penusah bebadi ba jalai alun lalu nabanka nyawa ketegal ari deriba ti ngereja penyalah ngelih perengka pengangkut bukai enggau chara enda likun, pansut ari simpang enda meri signal tauka kelalu laju enda nitihka tikas pengelaju ke udah dikemendarka ti ngujungka tepawah,” ku iya.
Kelimpah ari nya, penyampau saman ti dikeluarka ketegal mayuh penyalah pengelama 15 hari Op Selamat 13/2018 bisi 12,699 saman.