Ikan Tengadak bansa ikan ke berega
KAPIT: Rega sekilo Ikan Tengadak manggai RM400 agi dikumbai murah laban rega terus ari raban berikan. Enti sema orang tengah, rega nya manggai RM450 tauka mar agi sekilo ke eksport.
Orang berikan ngulihka ikan nya kemari ngena ginti ngulihka ke pemerat sekilo, di Batang Rajang enda jauh ari Pasar Kapit.
Lelaki bansa Iban terus nyual ikan nya ngagai pengempu restoran di pasar ti nadai berasai beleman mayar RM400. Ku orang ti meli ikan nya, endang untung agi laban enti meli ari sida ti bejual ikan deka mar agi rega.
Rega nitihka pemerat ikan, 400 ngagai 500 gram berega RM40 sekilo, 600 ngagai 700 gram RM60 sekilo, 800 gram berega RM80 sekilo, 900 gram RM200 ngagai RM250 lalu sekilo enggau berat agi RM450 sekilo.
Ikan Tengadak tebilang ketegal penyamai isi iya ti manis sereta lembut. Mudah dipanduk, semina gulai lia mimit, garam lalu dikukus pengelama urung 10 minit. Udah tau dibantai lalu diempa.
Kapit nyadi serega ngagai mayuh bansa ikan eksotik di Sarawak. Taja pia, kitai enda nemu pengelama ulih tan enggau penatai Tekat Ai Baleh ti diperambu, deka mangka kualiti ai lalu ngeruga kandang ai di Batang Baleh, endur ikan tu bekandang.
Ketegal kelalu balat endur berikan sereta orang nadai tanggungpengawa bekenaka ‘ karan’ enggau ‘ nubai’ ikan, penyampau ikan majak kurang ngelama tu. Reti iya, bisi maya beduit pen kitai ulih meli ikan baka Ikan Tengadak tauka Ikan Empurau.
Antara ikan ulu sungai ti berega baka emas nitihka tangga, Ikan Empurau besai 3 kilo enggau berat agi urung RM850 ngagai RM900 sekilo, Ikan Tengadak sekilo enggau berat agi urung RM400 ngagai RM450 sekilo, Ikan Semah berat sekilo enggau berat agi RM180 ngagai RM200 bepanggai ba bansa iya, Ikan Padi enggau Ikan Mengalan, Ikan Labang (Ikan Patin), Ikan Tapa, Ikan Lajong, Ikan Sakam, Ikan Buang, sereta bansa ikan bukai mudah agi, kurang ari RM100.