Penyampau menteri, sapit menteri nengeri tu ti dipilih PH enda ngemuaska ati
KUCHING: Penyampau pengari ari nengeri tu ke dipadu nyadi menteri sereta sapit menteri ba renggat perintah besai Pakatan Harapan (PH), tebal agi enda ngemuaska ati rayat nengeri tu.
Presiden Kongres Nasional Dayak ( DNC), Paul Raja madahka, ke patut menua ti nyadi partner dalam Malaysia patut nadai dichiping ba pekara nya.
“Pasal pemayuh menteri, semua orang di Sarawak enda puas ati enggau penyampau nya. Kitai patut bisi pemadu mimit tiga iku menteri ari Sarawak, sebaka enggau Sabah.
“Baru Bian (Kaban Parlimen Selangau) enggau Chong Chieng Jen (Kaban Parlimen Stampin) endang patut dipadu nyadi menteri penuh laban seduai nguluka pejalai PH di Sarawak, menua deposit tetap.
“Ukai semina Sarawak patut bisi tiga iku menteri tang sapit menteri besai mega mesti dipadu ke tiap buah menua ti nyadi kaban ngempung Malaysia – sapit menteri besai ari Sarawak, Sabah enggau Malaya,” ku Paul nengah penerang berit, kemari.
Berebak enggau tu iya meri pengaga ati ngagai Baru ke udah dipaduka nyadi Menteri Kerja Raya sereta Chong nyadi Sapit Menteri Dagang Dalam Nengeri enggau Hal Ehwal Penguna.
Kitai enda tau enda ingat pengawa bepilih di Sarawak berat sepiak lalu PH bekimpin ari pengurang ngelaban pengering BNPBB ti disokong perintah sereta perengka guna ti penuh dikena sida, ku Paul.
“Siti saut mudah lapa kebuah semina siko ajak menteri ari Sarawak ia nya pemayuh Kaban Parlimen (MP) mimit amat.
“Kelimpah ari nya, engka siti kebuah ia nya Sarawak sebuah menua penyakal. Dalam runding politik ngelama tu suba, menua penyakal endang kurang dikeibuhka,” ku iya.
Taja pia ku Raja, pengawa tu engka deka berubah laban diatu PH megai perintah – ti besemaya deka meri ungkup belanja ngagai MP penyakal enda baka perintah BN suba ke ngenusah penyakal ngambika penyakal enda ulih mujur dalam pengawa sida.
Bejaku baru iya madahka ari perening ke lebih jauh agi engka Menteri Besai Tun Dr mahathir Mohamad beben- dar deka mutarka menua tu ngambika muai prisikologi bepelasarka bansa, jalai pengarap enggau menua ti nagang ngagai penyerakup nasional.
Nya alai pengandal kitai ngagai perintah ke jemah ila endang perintah ti nadai bechiping sereta perintah ti manah.
Tau mega dikeingat Tun M bisi nyebut menteri Sarawak enda ngereja pengawa ti patut dikereja sida kena ngemansangka Sarawak. Tang semina ngayan diri enggau bajet pemansang ti diberi ngagai Sarawak.
“Ari nya, menteri kitai ari Sarawak enda tau enda ulih nunjukka diri endang patut dipadu nyadi menteri ti kitai arap deka dikereja sida enggau manah.
“Pengawa ngamatka manifesto diatu benung dikereja. Semina maya aja deka nentuka ulih tauka enda ia dikeamat. Ubah dalam gaya menua mega deka nentuka semaya ti relevan enggau enda relevan.
“Tang di Sarawak, sekeda dipelaba enda ulih dikeamatka laban menua tu nyadi penyakal. Ari nya, tu bepanggai ba kerejasama entara perintah besai enggau perintah menua,” ku iya.