SMK Telang Usan ngerami prinsipal ti pindah ngagai SMK Bawang Assan
MARUDI: Prinsipal Sekula Sekondari (SMK) Telang Usan, Nicholas Kanyan tauka Abdul Rahman Abdulah, deka mindah gawa ngagai SMK Bawang Assan di Sibu.
Kanyan udah gawa nyadi prinsipal di SMK Telang Usan kenyau ari 20 September 2015 lalu tu taun ketiga iya gawa dia. Kanyan siku pengajar chukup kemerah sereta lurus lebuhka begulai enggau peranak di Marudi nyengkaum bala staf enggau nembiak iya, lalu semua sida deka berasai puang.
Kanyan meri terima kasih ngagai semua kerejasama enggau semangat gawa begulai ngagai bala staf, kaban exco Serakup Apai Indai enggau Pengajar (PIBG) sekula, bala Pemesai Opis Pelajar (PPD) Baram sereta bala komuniti di menua nya lebuh iya bejaku rambau atur makai gempuru ngerami iya mindah gawa, diatur di sekula nya pagi kemari.
“Terima kasih mega nga- gai bala pengajar ti udah ngayanka sida ransing belajar sereta ngemai pemujur ba atur program sekula sereta ngemanahka penyapai akademik, PT3 enggau SPM. Mayuh transformasyen budaya sekula, ubah ba fizikal enggau perengka guna sekula pulaika pemaik ngagai raban sekula.”
“Kelimpah ari nya, minta ampun ba pengelemi lalu ngarapka bala staf seruran meri sukung sida ngagai prinsipal baru, sinnag Henry Kachak, sereta meri kerejasama, besaup ba semua kereja enggau atur pengawa,” ku Kanyan nambah.
Peranak di menua nya madahka sida deka berasai puang ditinggalka siku ketuai biak ti chukup manah baka Nicholas Kanyan ti dikumbai sida chukup kemerah sereta mayuh bakih.
Sida ngarapka diri deka betemu baru enggau Kanyan sereta anang lelenggauka Ikan Bawan Marudi.