UGRS deka ngatur ‘Larian Amal Kami Anak Malaysia 2018’ kena 14 Oktober

SIBU: Underground Runners Sibu (UGRS) deka ngatur ‘Larian Amal Kami Anak Malaysia 2018’ kena 14 Oktober ti deka datai.

Chairman komiti pengatur, Awangku Afzandy Awang Ali Baba madah, pekit tu tebuka ngagai penyereta beumur ari tujuh taun ke atas.

“Kitai merambu pekit tu ila deka digulu 500 iku penyereta besemekih ba penyauh empat kilometer,” pia ku iya madah maya aum media, empai lama.

Iya madah, bayar enggau pekit tu iya nya RM50 kelimpah bayar RM10 agi dikena meri Persatuan Autistik Sibu (SAA) enggau Yayasan Buah Pinggang Sibu (SKF).

“Seraya kitai besaup meri bantu ngagai SAA enggau SKF, pekit tu mega dikena kitai bebai pangan diri ngemeranka pengidup bepengerai sereta nyintal kaul pupu raban bansa,” ku iya ti mega Sapit Presiden UGRS.

Pekit tu ila deka berengkah ari Dataran Tuanku Haji Bujang Fasa II nengah Jalai Awang Ramli Amit, Bulatan Simpang Tiga sebedau nikal baru nengah Jalai Awang Ramli Amit lalu datai ba adan Dataran Tuanku Haji Bujang Fasa II.

Sepuluh iku penyereta pemadu nyulut deka mai perais mata duit.

Semua penyereta mega deka diberi baju lalu sida ke mujur nembuka pekit deka mai midul.

Pengawa ngerejister nama enda tau ngelui ari 14 September 2018.

Bayar enggau rejister tau dipeda nengah www.ugrs. com.my.

Penerang silik tau ditanya ngagai Azlan (016-8924271), Deana (019-4675988), Mus (013-5763320) enggau Andy (016-8906486).