KPJ Kuching ngatur kelas ‘Parentcraft’ ungkup orang indu ti keterubah ngandung
KUCHING: Ngadaka anak enda patut nyadi peneleba ti ngenakutka tauka traumatik ngagai orang indu.
Laban tiap orang indu tauka indai ti ngandung mai seiku indu ngagai pejalai pengidup ti nyelai lebih agi mai tauka ngadaka anak mit ke dunya tu.
Ngadaka anak tu siti ari pekara ti pemadu indah enggau ajaib ti ditapi sereta diasaika orang indu dalam pengidup.
Berindik ari pekara nya, sepital KPJ Kuching ngatur kelas ‘ Parentcraft’ dikena mantu orang indu nyikap diri tauka besedia ngadaka anak sereta nyadi indai lebih agi ngagai orang indu ti keterubah iya ngandung.
Kelas ‘Parentcraft’ entara inisiatif tanggungpengawa rama korporat (CSR) sepital nya, ti diatur ba sebuah hotel ditu, kemari.
Tuju kelas nya diatur mega dikena ngangkat tauka nambahka penemu, pemahaman enggau pengelandik praktikal ke diguna seseiku indai dikena nentuka pemansang fizikal, runding tauka psikologi enggau rama anak sereta ruang bilik.
Program nya diatur ngena mayuh chara, ti mungkur seraban profesional penyaga pengerai ti gawa begulai ke lalu ulih mantu, meri penerang enggau nyukung institusi ruang bilik.
Topik ke dikenang dalam program nya nyangkaum “Hello Baby!” ke dibai Doktor Pakar Obstetrician dan Gynecologist, Dr. Wendy Loh Leh Hung; “Caring for newborn” ulih Doktor Pakar Paediatrician, Dr. Siew Hueh Fen.
Tajuk “Pain Relief in Labour” dipejuraika ulih Doktor Pakar Anaesthesiologist, Dr. Chen Chee Kean enggau “Baby Care Basis” ulih bidan ari KPJ.
Kelimpah ari nya, pesereta mega dibai tauka diajar senaman regangan ti patut ungkup orang indu ngandung, ulih Physiotherapist hospital.
Kelas ‘Parentcraft’ diatur berindik ari penyulut Kempen Kerusi Keselamatan Kanak-Kanak ti diatur bulan April apin lama, dikena meri penyedar pasal pemesai guna ngena kerusi pengelikun.
Sekali agi sepital tu nempa penyulut sereta mechah rikut kelas iya nya lebih 80 iku pesereta ngulu Kelas ‘Parentcraft’.