EGM deka nentuka kuing SUPP Pampang Dudong

SIBU: SUPP Pampang Dudong deka ngatur Extraordinary General Meeting ( EGM) pagila ngambika ulih ngaga pemutus sekalika ngelengkaka Barisan Nasional ( BN) lalu begempung enggau Gabungan Parti Sarawak (GPS).

Chairman pampang nya Wong Chih Yong, madahka aum nya berengkah pukul 10 pagi ba premis pampang nya, ke deka meri peluang ngagai kaban parti nya ngenataika buah penemu sekalika SUPP patut ngenatka diri enggau BN.

“Nyema SUPP ngelengkaka BN, patut enda SUPP begempung GPS tauka ngatika diri.

“Engka bisi sekeda orang udah macha ba surat berita ti madahka SUPP udah ngelengkaka diri ari BN.

“Tang pemutus ke baka nya, nyema bisi, by pusat parti ngaga pemutus nadai madah ngagai kaban parti,” ku iya m adah ba aum media ba pampang premis nya kemari.

Ku Wong, ari baruh Artikel 19 konstitusyen parti, pengari konfren bisi ku asa ngenataika buah penemu sentang parti ba barang pekara bekaul enggau kuing parti tauka ba tanya sentang polisi mensia mayuh enggau peneka bukai.

“Ba kami semina pengari parti bisi haka ari baruh Artikel 19(3). Komiti pusat ari baruh Artikel 25 ti nadai hak nnetapka polisi mensia mayuh enggau kuing politik SUPP.

“Lalu nya enda tau enda diputuska pengari konfren nya. Juluk EGM dikena ngenataika buah penemu ari kaban parti pampang Dudong,” ku iya.

Ku iya, sebarang pengawa bepilih maya EGM enda tau enda digaga nengah undi rasia.

“Pusat parti kami seruran meransang kami bejalaika pengawa, reti nya begulai enggau rayat. EGM ke deka diatur tu mih chara ke pemadu manah dikena nemu runding kaban parti,” ku Wong.

SUPP Pampang Dudong bisi 1,600 kaban.