Pekara nya dikemudah pengudah Perintah Sarawak netapka deka meri sukung ngagai PH di parlimen
KUCHING: Kaul entara Perintah Besai Pakatan Harapan (PH) enggau perintah nengeri nadai napi pemar ditegapka agi, ku Sapit Presiden Parti Amanah Negara (AMANAH) Salahuddin Ayub.
Bejaku ngagai pengarang berita pengudah penemuai basa ngagai Kepala Menteri di Komplek Dewan Undang Nengeri ( DUN) kemari, Salahuddin madahka pekara nya dikemudah pengudah Perintah Sarawak netapka deka meri sukung ngagai PH di parlimen.
“Kami berandauka pekara betunga mua. Aku chukup pechaya ba jeman baru Pakatan Harapan mayuh isu deka dikerandau.
“Tuju penemuai aku iya nya ngenegap kaul entara perintah besai enggau perintah nengeri,” ku iya ke mega Bumai enggau Industri Betanam Betupi.
Salahuddin nambah tajapan ari sukut politik engka sekeda orang bisi nyangka kaul tu mar diadu ketegal ba DUN Sarawak bisi penyakal ari PH.
Tajapia ku iya, kami udah meri jamin isu nya enda deka nyadi penanggul ungkup kitai ngeratka kaul entara kededua perintah.
Tuju penemuai aku iya nya ngenegap kaul entara perintah besai enggau perintah nengeri. Salahuddin Ayub Menteri Bumai enggau Industri Betanam Betupi
“Perintah Sarawak udah meri pemutus deka nyukung kitai (PH) ba parlimen.
“Tu siti pekara ke chukup berat lalu nengah semengat tu, kaul entara pengari PH dalam DUN Sarawak deka neladanka semengat ke sama.
“Nadai salah ngembuan penemu ke bebida ba pekara ke bekaul enggau pemaik rayat,” ku iya.
Salahuddin madah, ke pemadu berat iya nya rayat bulih pemaik ba jeman baru PH nengah kerejasama Perintah Sarawak betuaika Datuk Patinggi Abang Johari Tun Openg.