Lapan aktiviti besai diatur nyerumba Hari Kemerdekaan Sarawak 2018
KUCHING: Rayat nengeri tu diperansang nyereta lapan aktiviti besai ke deka diatur nyerumba Hari Kemerdekaan Sarawak 2018, di mengeri tu.
Menteri Kaunsil Kandang Menua enggau Pengawa Berumah, Datuk Prof Dr Sim Kui Hian madah, taun tu pengerami ngintu Hari Kemerdekaan Sarawak 22 Julai diatur ngena skala besai nengah apan aktiviti ke dipejalaika dalam timpuh dua minggu.
“Taun tu bebida ari taun nyin kemari, ke alai taun tu kitai bisi ngerintai 8 aktiviti besai dikena ngingatka hari besai kitai Sarawak.
“Aktiviti ke pemadu besai diatur dikena ngingatka kitai merdeka ari British iya nya Gempuru Hari Merdeka kena 22 Julai ti diatur Dataran Perayaan, Jalai Stadium.
“Kitai nesau sereta ngarapka mensia mayuh di serata Sarawak sekalika orang ari genturung pendiau, Gerempung Ukai Dikuasa Perintah ( NGO), gerempung, opis perintah, nembiak sekula sekondari, universiti perintah enggau peribit datai sampal ngagai pengerami tu.
“Tu mih peluang endur kitai sama datai lalu ngayanka penyerakup,” ku iya ke nyadi Menteri diberi tanggungpengawa ngatur pengerami Hari Kemerdekaan Sarawak 2018, nagit urung 10,000 iku orang datai.
Dulu ari nya, Dr Sim nyadi chairman aum bekaul enggau Hari Kemerdekaan Sarawak 2018 ke diatur ba Bilik Baum Ringkat 2, Wisma Bapa Malaysia ditu, kemari.
Temuai ke pemadu dipebasa datai ngulu Gempuru Hari Merdeka kena 22 Julai iya nya Tuan Yang Teru- tama Yang Di-Pertua Negeri Sarawak Tun Pehin Sri Abdul Taib Mahmud enggau bini iya, Toh Puan Datuk Patinggi Raghad Kurdi Taib sereta Kepala Menteri Datuk Patinggi Abang Johari Tun Openg enggau bini iya Datin Amar Datuk Juma’ani Tun Tuanku Bujang.
Kelimpah ari aktiviti besai Gempuru Hari Merdeka kena 22 Julai, aktiviti keterubah diatur nyerumba Hari Kemerdekaan Sarawak 2018 iya nya Unity Futsal Tournament kena 14-15 Julai ba Padang Merdeka.
Entara aktiviti bukai baka Majlis Kesyukuran ba Masjid Darul Hana kena 20 Julai; MAKSAK Unity 722 Challenge ( MY722C) kena 21 Julai ba DUN Lama sereta 722 Sarawak Independence Day Unity Run ba Tebing Ai Kuching (malam 21 Julai) ke belanda sepenyauh 5 kilometer ti mungkur tebing ai, pasar, genturung pendiau sereta Jematan Darul Hana.
Nambahka nya, 722 Sarawak Independence Day Unity Ride (22 Julai) ba Dataran Perayaan ti dipelabaka urung 700 iku orang ke nepan basikal ngelingi Kuching deka ngambi bagi.
Malam 22 Julai, konsert Unity 722 # IBUPERTIWIKU diatur ba Dataran Perayaan ke alai mensia mayuh deka diperindang bala artis asal nengeri tu empu lalu aktiviti kelapan iya nya Pengawa Pemansang Ibu Pertiwiku ba Plaza Merdeka kena 22-29 Julai.
“Semua lapan aktiviti besai nya diatur ba Kuching ditu, tang kami udah minta semua opis pelilih menua di serata nengeri tu ngatur akiviti dikena ngingatka Hari Kemerdekaan Sarawak ba endur diri.
“Taun baru engka kitai deka ngatur pekit ngambi video nyerumba Hari Kemerdekaan Sarawak. Ambika chunto ngena video pengelama dua minit nuan ulih ngirumka pesan meri Selamat Hari Kemerdekaan Sarawak,” ku iya seraya madahka pekara diperambu deka dipejalaika maya ngintu Hari Kemerdekaan Sarawak kali ke-4, taun baru.
Sama bisi datai ba aum pengarang berita nya kemari, Menteri Muda ba Opis Kepala Menteri (Undang-undang, Kaul Nengeri enggau Perintah Besai enggau pematau Projek, Sharifah Hasida Sayeed Aman Ghazali ke nyadi sapit menteri ti diberi tanggungpengawa ngatur pengerami nya, sereta ke bukai.