Kelebih agi ungkup rayat di kandang menua ulu Baram enggau Lawas ti andalka perengkaguna jalai alun ke manah agi
MIRI: Unit Nembiak Parti Pesaka Bumiputera Bersatu (PBB) Telang Usan ngarapka Menteri Kereja Raya ke baru iya nya Baru Bian ulih nentuka pengandal rayat dijapai kelebih agi ba kandang menua ulu Baram enggau Lawas dikena ngasaika perengkaguna jalai alun ke manah agi.
Ketuai Nembiak PBB Telang Usan Kunsilor Dominic Nyurang Ajeng madah sida udah tentu andal ati enggau pengawa nyiri Baru nyadi menteri ba opis menteri nya kelebih agi iya mega komuniti Orang Ulu ti keterubah dichiri nyadi menteri penuh ba kabinet besai.
Dominic madah, Baram ambika chunto ti endang begunaka jalai tar lalu bisi disempulang enggau perengkaguna lampu jalai ti nyambung terus ke kandang endur bukai baka Long Lama, Apoh Tutoh enggau Bario.
“Peminta ngangkat manah jalai tu udah lama dipinta peranak Baram lebuh perintah agi dipegai barisan Nasional (BN), tang enda dipejalai. Taja pan BN udah meri agih belanja ti besai ungkup pemansang jalai nya, tang enda chukup manah lalu lubah ke peranak Baram.
“Nya alai, nyangka Baru enggau perintah Pakatan Harapan (PH) ulih bejalaika projek jalai nya ke ulih dulu agi tauka nitihka timpuh ke udah ditetapka nitih pemuas ati rayat Baram,” ku iya ba siti penerang media, kemari.
Dominic nambah, unit Nembiak Telang Usan mega sama bisi madahka peminta rayat Baram ke dekaka jalai alun ti betar lalu nyambung tetian genturung pendiau enggau rumah panjai di selampur sitak Baram baka ti dipinta sida lebuh ti perintah BN megai suba lalu diatu tanggungpengawa nya dilemapaika ngagai PH.
Jalai batang ke bisi diatu iya nya mungkur penyauh 225 km ari Long Lama-Bario, Long Lama-Long Iman (97 km) enggau projek ngaga jalai tar ari Long Lama-Long Iman deka mai pemaik ngagai mayuh genturung pendiau di kandang menua Apoh entara nya Long Bemang, Long Wat, Long Atip enggau Long Bedian.
“Kami mega dekaka projek ngaga jalai ari Long Lama ke Long Kesseh ke sebedau tu diketuka laban bisi penanggul berapa taun ke udah ulih diteruska sereta digaga enggau lengkas. Perintah BN enda ulih mansa kandang endur tu sebedau tu, tang Baru nyangka ulih mutarka penanggul nya lalu bejalaika projek ngaga jalai di kandang endur nya enggau manah,” ku iya nambah.
Peminta ngangkatmanah jalai tu udah lama dipinta peranak Baram lebuh perintah agi dipegai barisan Nasional (BN), tang enda dipejalai. Taja pan BN udah meri agih belanja ti besai ungkup pemansang jalai nya, tang enda chukup manah lalu lubah ke peranak Baram. Kunsilor Dominic Nyurang Ajeng Ketuai Nembiak PBB Telang Usan