Harden: Aktiviti ke diatur gerempung beguna amat dikena negap sereta nyerakupka rayat
SRI AMAN: Tetiap gerempung di negeri tu diperansang ngatur aktiviti begulai enggau mensia mayuh dikena negapka penyerakup ba rayat.
Menteri Muda Pengelantang Komuniti Sarawak, Datuk Francis Harden Hollis madah, perintah seruran meransang tetiap iku mensia mayuh nyadi kaban gerempung dikena ngangkatka semengat sereta kerejasama enggau pangan diri.
“Penyereta mensia mayuh dalam gerempung enggau serakup di nengeri tu beguna amat dikena ngemujurka juluk rayat beserakup sereta idup likun,” ku iya.
Bejaku ba pengerami Begulai enggau Rayat sereta Nyuaka Perais Pekit Ngias Rumah ke diatur Komiti Pengasih Islam Ketuai Raban Bansa enggau Ketuai Bansa sitak Kunsil Nengeri (DUN) Simanggang di Stadium Mini, Sri Aman ditu, Harden madahka geempung bejalaika tanggungpengawa ke beguna amat ngelakuka adat enggau daya pengidup pupu bansa di Sarawak.
“Tetiap pupu bansa di negeri tu ngembuan penyelai adat enggau daya pengidup diri empu. Nya alai, nengah gerempung, kitai bepeluang ngangkatka nya ng agai siti renggat ke tinggi agi,” ku iya.
Ku Harden, semengat bekerejasama,pemagas enggau pengelurus ba bala ketuai enggau kaban gerempung pekara ke beguna amat dikena ngetanka penuduk sesebengkah gerempung.
“Pekara nya meseti bisi dalam tetiap gerempung dikena nentuka gerempung nya seruran regas sereta ngetanka kerejasama,” ku iya.
Sama bisi ngulu pengerami nya,Sapit Residen Pemansang Bagi Menua Sri Aman, Philip Peter Salam, Penghulu Abdul Samad Abdul Rahim, Pemancha Lee Siang Hua, Penghulu Tiong Chong Onn enggau bala ketuai raban bansa ke bukai.
Ba pen gerami nya, Harden udah nyuaka geran ari perintah sepenyampau RM16,000 ungkup Program Begulai enggau Rayat Maya Aidilfitri sereta Nyuaka Perais Pekit Ngias Rumah sereta Mangkuk Datuk Francis Harden Hollis ungkup taun 2018 ngagai Chairman Pengatur Pengerami Hari Raya Aidilfitri 2018, Jolly Ramli.
Iya mega bisi nyuaka geran tambah RM51,000 ngagai 22 Komiti Pemansang enggau Pengelikun Genturung Pendiau (JKKK) Melayu DUN Simanggang ke tuju dikena ngaga aktiviti sepanjai taun sida.