PESTAS nagit 30 tim nyereta Pekit Takraw Tetutup Kandang Tengah Sarawak
SIBU: Gerempung Sepak Takraw Sibu ( PESTAS) nagit dalam 30 tim ti nyereta Pekit Sepak Takraw Tetutup Kandang Tengah Sarawak ke deka berengkah ari 14 nyentuk 15 Julai tu bepalan ba balai di Kampung Bandong, ditu.
Jurujaku PESTAS Mohd Zainorin madah, nyema pekit nya ulih nyapai lebih ari 30 tim, timpuh pekit nya ila deka dipanjaika.
“Kitai nagit 30 tim, tang mayuh agi rami agi pekit tu ila,” ku iya lebuh dikerandau pengarang berita kemari.
Ku iya madah, pekit tu iya nya deka ngulihka pemain ke baru ti landik.
“Pemain ke dipeda manah bemain lebuh pekit tu ila, nyangka deka dirintaipandak ngambi dipasukka dalam tim bagi menua dikena kitai nyikap diri ungkup pekit sepak takraw renggat nengeri ke deka digaga di Kuching taun tu,” ku iya.
Pekit tu, ku iya nandu, deka meri perais sepenyampau RM1,500 sereta troi enggau midul ngagai tim ti nyadi champion, lalu ba penuduk lumur dua deka mai pulai perais mata duit RM1,000, troi enggau midul.
Ba penuduk lumur tiga enggau empat deka mai pulai mata duit RM500 enggau midul.
Beserimbai enggau nya, iya minta semua tim takraw ke ngembuan pengingin ati ari Sarikei, Kapit, Kanowit, Daro enggau ke bukai dipinta datai sama nyereta pekit tu.
Pekit tu iya nya diatur PESTAS lalu haribulan kepenudi nganjung pom penyereta iya nya kena 13 Julai lalu nyabut gintir deka digaga ba ari ti sama urung pukul 5 lemai.
Bayar enggau nyereta pekit tu iya nya RM80.
Pom nyereta pekit tu ulih dipinta ngagai Abdul Rahim ba lumur telefon 0111-2641489, Afizan Sahri (014-6848767) tauka Mohd Zainorin (01111-523685).