Perintah Jepun meri kereban perubat urung RM124,000 ke PPKS

MIRI: PerintahJepunudahmeri geran bantu urung RM124,000 ngagai Persatuan Perancangan Keluarga Sarawak (PPKS) dikena mantu orang indu di nengeri tu ngulihka servis pengerai ke manah agi.

Geran bantu nya udah dikena meli kereban ‘ultrasound’ enggau dua ‘autoclaves’ ke udah disuaka ngagai PPKS ba pengerami mit ke udah digaga ditu, kena Hari Empat tu tadi.

Pengerami nya udah digulu Ketuai Konsul Opis Konsulat Jepun di Kota Kinabalu Hiroko Matsuo, ke udah ngarika perintah Jipun nyuaka pemeri nya ngagai PPKS ti diarika chairman sida Wee Chong Hui.

Sama bisi datai iya nya Chairman PPKS Pampang Miri Susie Lau.

Ku Hiroko, geran bantu nya ari baruh Projek Keselamatan Manusia Akar Umbi (GGP) ti mega siti skim ke udah dikelala dikena mantu mensia mayuh sereta sida ti endang begunaka bantu.

“Dikearap nengah bantu ti udah disuaka nya, tu ulih dikena enggau memanah lalu ulih meri pengidup ruang bilik di nengeri tu enggau manah agi ungkup timpuh panjai.

“Pia mega, projek bansa tu ulih ngayanka kaul bekaban entara Jepun enggau Sarawak, kelimpah pengawa ti mantu pangan diri ke udah diberi perintah Jepun ngagai rayat ditu,” ku iya.

Ku Hiroko, kenyau ari taun 1989, ari baruh GGP nya, perintah Jepun udah bejalaika lebih 50 projek ungkup pemaik komuniti Sarawak enggau Sabah.

Ku iya, projek nya nyengkaum projek nyambung bekal elekterik ngena sistem solar enggau ngangkatmanah perengkaguna perubat.

“Naka ke diatu, semua projek nya nerima agih belanja urung RM6.7 juta,” ku iya nambah.

Hiroko megamadah, Konsul Opis Konsulat Jepun di Kota Kinabalu seruran meri respon ngagai tetiap perambu ke manah ari mayuh piak Gerempung Ukai Dikuasa Perintah (NGO) sereta gerempung ti ukai ngiga untung dikena bejalaika projek ari baruh GGP.

Kelimpah ari Sarawak, perintah Jepun mega udah meri sebuah van enggau kereban ‘ scanning ultrasound’ ngagai PPKS kena Mei 2016.