Komiti ngintu pekara betanam betupi deka ditumbuh di S’wak
KUCHING: Perintah Besai enggau perintah nengeri setuju numbuhka siti komiti begulai ti deka ngintu pekara ke bekaul enggau pengawa betanam betupi di Sarawak.
Perkara nya disetuju Kepala Menteri Datuk Patinggi Abang Johari Tun Openg enggau Menteri Bumai enggau Industri Betanam Betupi ( MOA), Salahuddin Ayub ba penemuai basa menteri nya (Ayub) ngagai Abang Johari di Komplek Dewan Kunsil Nengeri ( DUN) kemari.
Salahuddin lebuh dikerandau pengarang berita tembu pengawa nya madah komiti begulai ke ditumbuh deka ngangkatka Sarawak nyadi palan betanam betupi moden di menua tu.
“Aku meda potensial pengawa betanam betupi di Nengeri Sarawak ti nyauka sama pemesai enggau Semenanjung Malaysia.
“Kami berandauka sentang umai bedandang besai sereta pia mega sentang pengawa nupi chapi dagin enggau tusu kelimpah ari berandauka sentang pengawa betanam betupi ke bukai.
“Asil ari randau tu kitai setuju numbuhka siti komiti begulai,” ku iya.
Dalam komiti begulai nya, perintah besai ku Salahuddin diarika MOA lalu Perintah Sarawak diarika Opis Menteri Betanam Betupi Moden, Tanah Adat enggau Pemansang Kandang Menua (MANRED).
Salahuddin ngarap nengah atur numbuhka komiti begulai nya, pekara birokrasi enda deka ayan.
“Nadai agi pemar ti deka ngeruga pemanah kaul kitai tu. Aku dekaka pengawa betanam betupi nadai napi isu birokrasi.
“Tu mih jamin ke ulih diberi aku, sebarang insentif, pengelandik, kaul manah, randau entara kitai deka dikemudahka agi.
“Aku dekaka Sarawak nyadi palan pengawa betanam betupi moden lalu mai pemisi belanja ngagai menua,” ku iya.
Kelimpah ari nya, Salahuddin mega madahka isu lisin berikan dalam kandang tasik Sarawak mega bisi dikerandau enggau Abang Johari.
Ku iya, isu nya meseti diputar enggau lengkas ke alai komiti begulai mega deka beratika isu nya.
Bela ngulu randau Sapit Kepala Menteri Datuk Amar Douglas Uggah enggau Menteri Muda Betanam Betupi Abdul Rahman Junaidi.
Bisi 6.7 juta sida ke beumur 16 taun ke atas ti udah tau ngambi lisin, nadai lisin deriba. Mohd Syafiq Anas Abdullah Direktor Opis Perengka Pengangkut Darat Sarawak
Nitihku Direktor Opis Perengka Pengangkut Darat (JPJ) Sarawak Mohd Syafiq Anas Abdullah madah, bepelasarka ripot statistik JPJ taun 2016 ngayanka sepenyampau 6,917 kes pemati di Malaysia iya nya 59.12 peratus orang ke deriba enggau penumpang mutosikal.
Ku iya, tebal agi sida nya raban biak enggau nembiak sekula.
“Bisi 6.7 juta sida ke beumur 16 taun ke atas ti udah tau ngambi lisin, nadai lisin deriba.
“Pekara tu mai pengerugi ti pemadu besai ngagai menua,” ku iya lebuh bejaku ba Pengerami Nutup MyLesen Kadet Renggat Zon Kuching JPJ Nengeri Sarawak ba Sekolah Menengah Kerajaan (SMK) Penrissen No. 1 ditu, kemari.
JPJ ngerikod sepenyampau 313,964 kes bebadi ba jalai alun dalam tempoh 2015 nga- gai 2017 ti mungkur nembiak sekula orang ke deriba enggau penumpang mutosikal di serata menua.
Sida tu ukai semina deriba perengka pengangkut tauka nepan mutosikal nadai lisin ke sah tang mega enda ngena helmet, ku iya.
Iya ulih meretika penanggul apai indai ke gawa sereta nadai awak nganjung anak nurun sekula, tang ku Mohd Syafiq apai indai patut terit sereta anang ngemendarka anak nurun sekula deriba perengka pengangkut tauka ngena mutosikal enti nadai lisin ke sah.
Beduduk ari pekara nya, JPJ bekerejasama enggau Institut Belajar Deriba sereta Opis Menteri Pelajar Malaysia kenyau ari taun 2016 bisi nyendiaka pakej lesen Kelas B2 ‘percubaan’ ti semina mayar RM199 dibandingka rega siling RM350 ba sekula belajar deriba biasa.
Pakej nya ku Mohd Syafiq, ungkup nembiak ke beumur 16 taun ke atas sereta nyadi Kadet JPJ ba sekula sereta nyereta kelas deriba ti standard disediaka JPJ.
Program MyLesen JPJ nya mujur narit 221 buah sekula di serata menua nyereta nya ke nyadi chara advokasyen.
Ba Sarawak bisi 17 buah sekula ke ngambi bagi dalam program nya, lalu pemadu mayuh penyereta ari SMK Penrissen.
Entara sekula ti nyereta di Miri iya nya SMK Agama, SMK Taman Tunku, SMK Pujut enggau SMK Lopeng; di Bintulu, SMK Baru, SMK Kemena enggau SMK Bintulu, sereta di Sibu, SMK Jalan Oya, SMK Sungai Me- rah, SMK Methodist, SMK Kampung Nangka
Nambahka nya, ba Kuching enggau Samarahan iya nya SMK Muara Tuang, SMK Padungan, SMK Bandar Semariang, SMK Demak Baru, SMK Kuching High enggau SMK Kota Samarahan, kelimpah ari SMK Penrissen No.1.
Penyampau penyereta Kadet JPJ taun tu mega ku iya manggai 912 iku ari nembiak sekula sekondari beumur 13 ngagai 17 taun.
Ari penyampau nya, 641 iku udah ngerejista diri tang semina 481 udah pas sereta bulih lisin deriba percubaan mutosikal Kelas B2 nya kemari.
Sama bisi datai, Prinsipal SMK Penrissen No.1, Lanyun Lupak, Menijar Institut Belajar Deriba WJ Wego, Chai Chiap Lim.