Sarawak Pay versyen 2.0 nagit ngerejista 10,000 komuniti orang dagang, ku Zaidi
KUCHING: Pengudah versyen keterubah, diatu Sarawak Pay versyen 2.0 nagit nambahka 10,000 komuniti orang dagang berejista lebuh manggai ujung taun tu.
Menijar Kaunsil Multimedia Sarawak (SMA) Dr Zaidi Razak madah, naka ke diatu dianggarka 100 orang dagang berejista ba aplikasyen ti dipenyadi dalam bulan November taun nyin kemari.
“kami benung berandau enggau beberapa entiti menua luar dikena muka awak ngagai Sarawak Pay awakka ulih ke menua luar.
“Entara nya kami udah ngepunka Memorandum Pemereti Ati (MoU) enggau Singapura lalu kami berandau enggau pengemeran baka Grap Pay sereta WeChat Pay,” ku iya.
Iya bejaku munyi nya lebuh meri Penerang Sentang Sarawak Pay Ke Pemadu Baru begulai enggau Komuniti Dagang sereta Media ti diatur SMA enggau SiliconNet Technologies Sdn Bhd ditu, kemari.
Nitihku iya, kelimpah ari nya sida mega merambu mai pansut aplikasiyennya pansut ari Sarawak baka ke Semanjung enggau Indonesia ti nyadi bakih kunsi berandau.
Ngenang pekara nya ku iya, SMA bisi ati deka seruran ngemaru tauka ngemanahka agi inisitif nya senipak enggau transformasyen teknologi digital ti kelalu jampat diatu.
Berebak enggau tu iya meri jamin ngagai rayat Sarawak iya nya SMA udah meda semua pekara pengelikun dikena nentuka nya likun sereta mudah dikena semua.
“Penerang diri empu ke diberi ngagai Sarawak Pay maya ngerejista deka dilindung tauka dijaga enggau manah nengah undang-undang enggau atur ke udah bisi di menua tu.
“Kitai dijaga ‘Akta Pelindungan Data Peribadi (PDPA) sereta atur Bank Negara Malaysia (BNM),” ku iya.
Kelimpah ari nya pengari SiliconNet Technologies Sdn Bhd, Lucy Wong lebuh ke meri licha madah, mayuh promosyen dipejalaika ungkup pengerejista Sarawak Pay.
“Ngagai orang dagang, sida deka nerima mata duit 10 peratus ke tetiap transaksyen nengah Sarawak Pay, kelimpah ari penguna baru mega deka diberi perais mata duit sepenyampau RM5,” ku iya.
Nambahka nya, Sarawak Pay Versyen 2.0 iya ngenukuka lumur kad pengelala enggau nama penguna maya ngerejista diri dikena ngisi pinta KYC BNM, iya nya ‘Know Your Customer’(Kenali Pelanggan Anda).
“Kelimpah ari nya, iya ngemeranka ‘ pengesahan’ penguna nengah pangkalan data Opis Pengerejista Bansa (JPN) ngena penyemaka lumur kad pengelala,” ku iya.
Nyentuk ke diatu ku iya, sistem bayar nadai ngena mata duit bisi 39 iti palan endur mayar bil ari perintah enggau tiga buah hotel iya nya Hotel Riversiden Majestic, Hotel Grand Margherita enggau Hotel Waterfront ngena aplikasyen nya maya mayar.