Rayat meseti pechayaka pengari rayat ke udah dipilih maya PRU14
MUKAH: Rayat patut pechaya penuh ngagai pengari rayat ke dipilih maya Pengawa Bepilih Besai (PRU) ke-14 bedau lama, kelebih agi ti ari baruh Parti Pesaka Bumiputera Bersatu (PBB).
Ex-Kaban Parlimen (MP) Mukah Tan Sri Muhammad Leo Micheal Toyad madahka sida agi pechaya pengering parti nya lalu pia mega enggau penumbuh Gabungan Parti Sarawak (GPS).
“Pemenang (PBB) di Mukah iya nya kelai rayat agi pechaya ngagai parti enggau orang ti megai,” ku iya ba ‘Majls Ramah Tamah Aidilfitri Lembaga Amanah Masjid Setiaraja Mukah dan Persekutuan Persatuan Melanau Sarawak (PPMS)’ di Dewan Suarah Mesra Mukah pagi kemari.
Nengah pengari Rayat ke udah dipilih, pekara ke ditegi sereta peminta peranak kelebih agi ungkup Mukah tetap deka diteruska.
Dato Haniah Hajar Taib udah mujur ngetanka sitak Mukah dipegai PBB dalam PRU14 ke bedau lama lebuh ti dilaban Abdul Jalil Bujang ari Pakatan Harapan (PH).
Rayat di Mukah ngarapka endang bisi deka meda Mukah dikemansang kelimpah ngetan sereta mulaika semua hak nengeri tu ti ngelamatu udah bisi dikeruga.
Leo mega ngarap kerejasama ari semua pengari rayat sekalika Kaban Parlimen tauka Kaban Kunsil Nengeri (ADUN) di sitak Mukah ungkup pemujur sitak nya jemah ila.
Leo ke mega Presiden PPMS sama meri jaku terima kasih ngagai semua peranak ke udah meri sukung ngagai iya sepengelama timpuh iya nyadi pengari rayat.
Bekaul pengerami nya, bantu mata duit udah diberi ngagai 100 iku penerima ti udah ngulu pengerami nya.
Sama bisi datai iya nya MP Mukah Datuk Haniah Hajar Taib enggau ADUN Balingian Abdul Yakub Arbi.