Perintah nadai deka ngambi duit ke udah diberi ngagai JKKK

SIBU: Perintah sekalika ba renggat perintah besai tauka perintah nengeri nadai deka ngambi duit ke udah diberi ngagai Komiti Pemansang enggau Pengelikun Genturung Pendiau ( JKKK).

Chairman Unit Bumiputera Parti Rakyat Bersatu ( UPP) Pampang Bawang Assan Andrew Shilling madahka sida bisi ninga sekeda ketuai raban bansa ti udah bejaku munyi nya ti madahka perintah deka ngambi duit ke udah diberi ngagai JKKK.

“Perintah sekalika perintah nengeri tauka perintah Pakatan Harapan (PH) enda deka ngachau duit ke udah diberi ngagai JKKK.

“Tuai rumah tauka ketua kampung ti kakang ati bekaul pekara nya tau betanya ngagai kami.

“Tu ngambika enda ngemingungka peranak rumah panjai lalu madah pengari rayat deka ngambi duit JKKK. Tu enda deka nyadi,” ku iya nyemetak madah lebuh ti bejaku ba Pengawa Nyuaka Geran Projek Mit Menua Pesisir ( MRP) ungkup 102 buah rumah panjai enggau genturung pendiau di sitak DUN Bawang Assan, kemari.

Penyampau semua geran MRP ke udah disua Kaban Kunsil Nengeri ( ADUN) Bawang Assan ke mega Menteri Dagang Antarabansa enggau E- Dagang Dato Sri Wong Soon Koh.

Andres ke mega Sekretari Politik ngagai Wong madah JKKK di Sarawak deka terus bisi tajapan di Semenanjung Malaysia deka digantika enggau Kaunsil Pengatur Komuniti Genturung Pendiau ( MPKK).

“Perintah PH semina nukar JKKK ngagai MPKK ba nengeri ke dipegai sida. Kitai anang saru madahka JKKK nadai agi di Sarawak,” ku iya.

Bejaku bekaul geran MRP, Andrew sekali agi ngelalau ketuai raban bansa ngambika enda magi agih belanja nya nitihka penyampau pintu ba rumah panjai sida empu.

Ku iya nandu, agih belanja nya patut disimpan ungkup guna sebuah rumah panjai kelebih agi maya napi penusah ngenyit.

“Nyema MRP dibagi, JKKK nadai ngembuan duit simpan. Nyema bisi duit simpan, kitai ulih ngena duit nya ungkup bejalaika projek mit,” ku iya nandu.

Iya mega minta JKKK ke agi bedau ngembuan akaun bank ngambika muka akaun ngambi ngemudahka agih belanja nya diberi.