Bisi 5,962 kes ari baruh Kort Bumiputera bedau diputarka

KUCHING: Naka 30 Mei 2018, bisi sepenyampau 11,003 kes dibaruh kuasa Kort Bumiputera Sarawak.

Berindik ari pekara nya Menteri Muda ba Opis Kepala Menteri ( Undang- undang enggau Adat Bumiputera), Datuk John Sikie Tayai, madahka Kort Bumiputera Sarawak deka terus chakah nyendiaka latih ungkup pemesai kort enggau pengere- ja pengawa majistret, dikena negapka atur pengawa kort.

Kort Bumiputera Sarawak nyendiaka latih nya kenyau ari taun 2010, ku Sikie.

“Penyampau semua kes dibaruh kuasa Kort Bumiputera Sarawak naka 30 Mei 2018 bisi 11,003 kes ke alai bisi 5,962 kes ke bedau diputarka.

“Pengawa nyendiaka latih pemesai kort tauka pengereja pengawa majistret deka ngenyampat sereta ngelancharka agi atur pengawa kort.

“Taun tu 2018, bisi 14 bengkel enggau kus udah sereta deka diatur ungkup raban ditagit, ti dipelabaka mungkur 1,060 pesereta,” ku iya lebuh nyaut tanya tambah ari Yussibnosh Balo (Tellian).

Sikie mansutka pekara nya maya sesi tanya saut ba aum Kunsil Nengeri (DUN) Ke-18, Hari Kedua di Kompleks Kunsil Nengeri ditu, kemari.

“Ba taun 2017 bisi 17 bengkel sereta kus udah diatur ungkup raban ditagit ti bisi 1,525 iku pesereta,” ku iya.

Dulu ari nya, iya madahka bekaul enggau kes Ngelanggar Adat, Kort Bumiputera Sarawak dipejalaika 2,546 iku ketuai bansa, 390 iku penghulu enggau 87 iku Pe- mancha/ Temenggong.

Nitihku Sikie, penyampau majistret ba Kort Bumiputera Sarawak bisi 19 iku ke dichiri gawa tetap ngena chara kunterik.

Majistret nya nyengkaum siku Presiden, Kort Apil Bumiputera; 2 iku Majistret, Kort Bumiputera Residen; enggau 16 iku Majistret, Kort Bumiputera Pelilih Menua, ku iya.

“Tanggungpengawa besai Majistret tu ngatur kes sivil baka kes belayaka tanah adat Bumiputera enggau kes Peminta Ngambika Dikelala Nyadi Komuniti Bumiputera,” ku iya.

Kelimpah ari nya, Kort Bumiputera Sarawak dipejalaika 52 iku ex- Pemesai Majistret nyengkaum 12 iku Residen Bagi enggau 40 iku Pemesai Opis Pelilih.