Uggah: RUU (Ubah) 2018 ngemetulka pengelemi undang-undang tanah PM, PG

KUCHING: Kaban Kunsil Nengeri (DUN) Layar Gerald Rentap Jabu bepenemu Rang Undang- undang (RUU) Kanun Tanah ( Ubah) 2018, ngayanka pengelurus meri hak enggau pinta bansa asal Sarawak ba pengawa neritka undangundang enggau pala tanah ke patut.

Ku iya, mayuh penemu bekaul ngubah undangundang tu sereta rayat nengeri tu endang nyukung perambu ubah undang- undang nya.

“Aram mih kitai nentuka ubah tu ulih ngelindung aset ke lebih besai ungkup rebak dudi ila,” ku iya lebuh ti sama enggau bejuraika RUU Kanun Tanah (PUbah) 2018, maya baum Kunsil Nengeri Ke-18 Hari Ketiga ba Kompleks Kunsil Nengeri ditu, kemari.

Rentap sama enggau bejuraika RUU nya ke dibantaika Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas ba bacha kedua kali kemari.

Bejaku baru, Rentap ngarapka Direktor Opis Tanah enggau Survei sereta pemesai ke gawa ngambika nyadi sistem manah enggau penuh integriti, bisi tanggungpengawa sereta pengelandik lebuh bejalaika tanggungpengawa baka ke dalam Kanun Tanah nya.

Iya ngarapka raban nya ukai bepanggai ba peminta lalu kes ke udah dipejurai ngambika dikemeratka sida.

Tanah bisi rega sereta dalam ‘Law of Scarcity’ deka nyungkak nya, ku iya.

“Nama ke dikearapka kami, kitai enggau naka ulih bebasaka adat enggau asal kitai ti meri hak ngagai rayat. Tu beguna amat dikena ngelindung, nyaga enggau nyapai rega ke tinggi,” ku iya ti madahka diri nyukung RUU Kanun Tanah (ubah) 2018. KUCHING: Tuju Rang Undang-Undang (RUU) Kanun Tanah (Ubah), 2018 dikena ngemetulka pengelemi tauka pengurang undang-undang tanah betulis ke udah bisi ba Sarawak ti bekaul enggau Pemakai Menua (PM) enggau Pulau Galau (PG).

Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madah, undang-undang tanah betulis nengeri enda terang bendar pasal PM enggau PG ti senipak enggau raban bansa bukai.

Nya alai ku iya, pekara nya udah ngeruga pengawa ngaku PM enggau PG nyadi tanah adat bansa asal (NCR).

Pengurang dalam undangundang kitai baka ti diayanka ba Kort Federal pengawa ngakim kes Direktor Kampung, Sarawak enggau Perintah Nengeri Sarawak enti dibandingka enggau Tr Sandah Tabau sereta 7 Ors, ke dikenataika kena 20 Disember 2016.

Kes nya ku iya, lebuh ke mantaika RUU Kanun Tanah (Ubah), 2018 Kort Federal ngemutuska PM enggau PG, ti dikemeranka orang Iban,

Kaban Kunsil Nengeri (DUN) Layar

nadai dalam undang-undang Sarawak.

“Ubah tu patut ketegal kes Tr Sandah ti nuntut 5,000 hektar, tang mahkamah nemu urung nyauka 2,800 ngagai 3,000 hektar nya temuda. Tang besepiak enggau temuda bisi kampung bungas, nya pan dituntut iya mega nunda adat PM enggau PG.

“Tang mahkamah enda ngelapas laban nya enda dalam kategori tanah temuda lalu adat PM enggau PG nadai kuasa undang-undang.

“Nya kebuah undangundang tu diubah ngambika kitai ulih ngelala(mengiktraf) adat PM enggau PG dalam undang-undang,” ku iya.

Uggah mansutka pekara nya dalam aum pengarang berita ba Bilik Media, Kunsil nengeri ditu kemari, lebuh ditanya bekaul enggau mayuh orang enda setuju enggau pemesai nya ke ditatak ngagai 500 hektar pemesai.

RUU Kanun Tanah (Ubah) 2018 deka dibacha Uggah ba ketiga kali sereta dipejurai sereta diputuska sehari tu ba Aum Kunsil Nengeri Ke-18 ba Hari Keempat.

Lebuh mantaika pasal perambu ubah undang-undang nya Uggah madahka asil ke pemadu beguna ari perambu undang-undang tu ngambika surat pala tanah NCR mendam sereta dikelala nyadi Kandang Menua Bansa Asal (NTD)

Tebal agi perintah ke alai raban bansa asal bisi meri hak ‘ unufuktur’ ngagai peranak sida ke diau asal ba endur diuan sida, tang ba Sarawak, ba baruh Gabungan Parti Sarawak (GPS), kandang menua diberi kuasa undang-undang enggau diaku nengah undang-undang nyadi engkeman ke betul, ku iya.

“Dokumen surat pala tanah deka diberi ngagai raban bansa ke bekaul dikena ngelindung kandang menua sida,” ku iya seraya madahka nya nyakal penemu sekeda orang ke dikangau champion hak asasi, keybord enggau mantah sereta perintah PH.

Uggah madahka orang ti enda setujuka RUU ketegal agenda politik diri empu.

Kelimpah ari nya, muak ke lemai kemari Spekaer Kunsil Nengeri Datuk Amar Mohamad Asfia Awang Nassar madahka bisi 35 iku ADUN ngambi bagi ba pengawa bejuraika RUU Kanun Tanah (Ubah) 2018, ke lalu deka diputuska pengudah bacha kali ketiga, sehari tu.