JBALB komited mutar penanggul bekal ai di nengeri tu

KUCHING: Opis Bekal Ai menua Pesisir (JBALB) deka terus komited mutarka penanggul bekal ai di nengeri tu.

Menteri Muda Bekal Ai, Datuk Liwan Lagang madah, taja pan baru ditumbuh sereta betapi pemar tang deka ngemanah sereta ngenegapka agi opis nya.

“JBALB tu agi baru lalu kami ngaku agi mayuh pekara ti patut dikemanahka nyengkaum bekaul enggau suntuk pemesai kelimpah ari ti udah lama.

“Senipak enggau ubah kitai ngena teknologi baru (ti begunaka pemesai ke landik dalam pekara nya),” ku iya lebuh nyaut tanya tambah ari Kaban Kunsil Nengeri (ADUN) Kabong, Mohmaad Chee Kadir.

Iya mansutka pekara nya maya sesi tanya saut ba Aum Kunsil Nengeri Ke- 18 ba Hari Ketiga ke diatur ba Kompleks Kunsil Nengeri ditu, kemari.

“Nambahka nya JBALB nyanggup pemar nya nengah nemuai seraya gawa baka Menteri empu ngabas sekeda stesyen enggau meri input, lalau sereta semengat ngagai pemesai,” ku iya.

Berebak enggau tu lebuh nyaut tanya bekaul projek ke deka dipejalaika ngena ungkup belanja ke dipadahka Kepala Menteri nyerumba ‘Program Sejiwa Senada’ ba Saratok kena 21 april 2018, Liwan madahka belanja dikena mutarka penanggul bekal ai ba kandang menua Kabong nengah 13 buah projek.

“Bisi 13 projek deka dipejalaika ari baruh ungkup belanja RM87 ti mungkur pengawa baka ngemanahka loji meseri ai, ‘stesen penggalak’ nganti paip.

“Projek paip ai sementara sepemanjai Jematan Tandeng Sari, Pusa ngagai Genturung Pendiau Pusa Seberang, Betong’ udah dipejalaika.

“Lalu projek ngemanah tebing ti digaga ba Palan Servis Nimbun Ai di Perabun, Saratok, Betong’ diatu udah manggai 46 peratus udah digaga sereta dipelabaka ulih tembu ujung taun 2018.

“Lalu laluh 11 projek dipelabaka deka tembu ba taun 2020,” ku iya.